İş adamına hansı ittihamlar verilib?
Fevralın 3-də Dövlət Təhlükəsizliyi Xidmətinin rəsmi məlumatı yayılıb. Qeyd olunur ki, “Baku Steel Company” MMC-nin Müşahidə Şurasının sədri Məmmədov Rasim Hikmət oğlunun səlahiyyətlərdən sui-istifadə edərək metallurgiya sənayesinin inkişafına, fiziki və hüquqi şəxslərin hüquqlarına, dövlətin qanunla qorunan mənafelərinə mühüm zərər vuran qanunsuz əməllərə yol verməsi ilə bağlı bilgilər araşdırılıb.
Açıqlamaya görə, Rasim Məmmədovun rəsmiləşdirilmiş satış üzrə müəssisəyə mədaxil edilmiş 13 milyon 200 min manatı mənimsəmə yolu ilə talamasına, 42 milyon manat dəyərində məhsulu israf etməsinə, həmçinin müxtəlif şəxslərdən külli miqdarda pul vəsaitini aldatma və etibardan sui-istifadə etməklə ələ keçirib təkrar dələduzluq əməlləri törətməsinə əsaslı şübhələr üzə çıxıb.
Rasim Məmmədovun Cinayət Məcəlləsinin 308.2-ci (vəzifə səlahiyyətlərindən ağır nəticələrə səbəb olan sui-istifadə), 179.4-cü (xüsusilə külli miqdarda ziyan vurmaqla mənimsəmə və israf etmə), 178.3.2-ci (külli miqdarda ziyan vurmaqla dələduzluq) maddələri ilə ittiham olunduğu, barəsində həbs qətimkan tədbiri seçildiyi bildirilir.
