Bələdiyyə monitorinqini kimlər aparacaq?
Azərbaycanda yerli demokratiyanın vəziyyətini qiymətləndirəcək beynəlxalq monitorinq qrupunun tərkibi açıqlanıb. Novator.az-ın məlumatına görə, ekspert Samir Əliyev yazır ki, Avropa Şurasının Yerli və Regional Hakimiyyətlər Konqresinin monitorinq qrupuna məruzəçilər Bernd Vöhringer (Almaniya), Stüart Dikson (Böyük Britaniya), müstəqil ekspert Françesko Palermo (İtaliya) və katiblik üzvləri daxildir.
Samir Əliyev bildirir ki, koronavirus pandemiyası üzündən qiymətləndirmə distant şəkildə olacaq, monitorinq qrupunun üzvləri Azərbaycana səfər etməyəcəklər.
Monitorinq qrupu Azərbaycan hökumətinin Avropa Yerli Özünüidarə Xartiyasının tələblərini yerinə yetirmə səviyyəsini qiymətləndirmək üçün iki dəfə müşahidə aparıb. Monitorinqlərin nəticəsi olaraq Azərbaycan hökumətinə yerli özünüidarə sahəsində problemlərin həllini sürətləndirmək tövsiyələri verilib. 126 saylı ilk tövsiyə 2003-cü ilə, 326 saylı tövsiyə 2012-ci ilə təsadüf edib. Üçüncü monitorinq 2020-ci ildə olmalı idi, amma koronavirus pandemiyasının yayılması səbəbindən təxirə salınıb.
Azərbaycanda bələdiyyə institutu 1999-cu ildən fəaliyyət göstərir. Yerli özünüidarə qurumlarına seçkilər 1999, 2004, 2009, 2014 və 2019-cu illərdə keçirilib.
Hazırda 1606 bələdiyyə var.
Bələdiyyə üzvlərinin sayı əhalinin sayından asılı olaraq 5, 7, 9, 11, 13, 15, 17, 19 nəfərdir.
