Əyani təhsilə neçə nəfər cəlb olunub?
Fevralın 1-dən Azərbaycanın ümumi təhsil müəssisələrində ənənəvi tədris qismən bərpa olunub. Təhsil Nazirliyinin məlumatına görə, məktəbəhazırlıq, icma əsaslı məktəbəqədər təhsil qrupları və ibtidai təhsil sinifləri qapılarını açıb.
İbtidai siniflər üzrə əyani təhsil Bakı, Sumqayıt və Abşeronda həftədə 3 dəfə, digər bölgələrdə həftədə 4-5 dəfə təşkil edilir, 628651 şagird əyani tədrisə cəlb olunur.
Məktəbəhazırlıq qruplarında 103604 uşaq, 50 bölgədə fəaliyyət göstərən 500 icma əsaslı məktəbəqədər təhsil qruplarında 9207 uşaq var.
Novator.az bildirir ki, Azərbaycanda təhsil müəssisələri 2020-ci il martın 3-dən koronavirus infeksiyası üzündən qapadılıb. Həmin il sentyabrın 15-dən başlayaraq təhsil müəssisələrində tədris və təlim-tərbiyə prosesi mərhələlərlə əyani formaya qaytarılıb. Nazirlər Kabinetinin 29 oktyabr 2020-ci il qərarı ilə təhsil müəssisələrində tədris və təlim-tərbiyə prosesi distant (məsafədən) formaya keçirilib.
2021-ci il yanvarın 22-də Nazirlər Kabineti təhsil müəssisələri ilə bağlı yeni qərar verib. Qərar fevralın 1-dən tədris və təlim-tərbiyə prosesinin əyani formada təşkilini nəzərdə tutur. Təhsil Nazirliyinə prosesi təhsil pillələri və səviyyələri üzrə mərhələli şəkildə təmin etmək tapşırılıb. Tabeliyində təhsil müəssisələri olan digər icra hakimiyyəti orqanları, dövlət mülkiyyətində olan və ya paylarının (səhmlərinin) nəzarət zərfi dövlətə məxsus olan hüquqi şəxslər və özəl təhsil müəssisələrinin təsisçiləri də eyni qərarlar qəbul edə bilər.
2019-cu ilin dekabr ayında Çində üzə çıxaraq dünyanı bürüyən koronavirus infeksiyasına Azərbaycanda ilk yoluxma 2020-ci il fevralın 28-də qeydə alınıb. Bu il fevralın 1-dək 230219 yoluxma olub, 3132 xəstə vəfat edib.
Ölkədə xüsusi karantin rejimi qüvvədədir. Sərhədlər qapadılıb, dəfn mərasimləri istisna olmaqla yas mərasimləri, kütləvi tədbirlər, ad günləri, toy, nişan və bu kimi mərasimlər yasaqlanıb, başqa qadağalar qoyulub.
