Neftsiz ixracın lider məhsulları
İqtisadi İslahatların Təhlili və Kommunikasiya Mərkəzi ixrac icmalı yayıb. Novator.az bildirir ki, rəsmi hesabatda 2020-ci ilin ümumi ixracı 13,7 milyard dollar, qeyri-neft sektoru üzrə ixrac 1,9 milyard dollar dəyərində göstərilir: “Qeyri-neft sektoru üzrə ixrac 2019-cu illə müqayisədə 5,2 faiz azalıb. Ən çox ixrac Rusiya (691 milyon dollar), Türkiyə (377,8 milyon dollar), İsveçrə (224,8 milyon dollar), Gürcüstan (127,6 milyon dollar) və Çinin (44,5 milyon dollar) payına düşüb.
İxrac edilən qeyri-neft sektoruna aid malların siyahısında qızıl 205,6 milyon dollarla birinci, pomidor 201,4 milyon dollarla ikinci, pambıq mahlıcı 131,9 milyon dollarla üçüncü olub.
2020-ci ilin meyvə-tərəvəz ixracı 607,7 milyon, pambıq lifi ixracı 133,2 milyon, alüminium və ondan hazırlanan məmulatların ixracı 113,4 milyon, kimya sənayesi məhsullarının ixracı 85,2 milyon, qara metallar və onlardan hazırlanan məmulatların ixracı 52,4 milyon, şəkər ixracı 26,9 milyon, bitki və heyvan mənşəli piylər və yağların ixracı 24,7 milyon, pambıq ipliyi ixracı 19 milyon, spirtli və spirtsiz içkilərin ixracı 12 milyon, çay ixracı 9,5 milyon dollar dəyərində rəsmiləşib.
Dövlət Gömrük Komitəsinin hesabatına görə, ötən il Azərbaycanın ixracında 86,5 faizlə neft-qaz sektoru birinci olub.
