Müdafiə Nazirliyindən Nəcməddin Sadıqov açıqlaması
General-polkovnik Nəcməddin Sadıqovun səhhətində problem yarandığı, Rusiyanın paytaxtı Moskvada ürəyindən əməliyyat olunduğu iddiaları yayılıb. Yanvarın 28-də APA bu iddialara aydınlıq gətirmək üçün Müdafiə Nazirliyinə sorğu ilə müraciət edib. Nazirlikdən deyiblər ki, Nəcməddin Sadıqov hazırda hərbi xidmətdə deyil.
Novator.az bildirir ki, Nəcməddin Sadıqov 1956-cı ildə Rusiyanın Dağıstan bölgəsinin Dərbənd şəhərində doğulub. Bakıda Ali Ümumqoşun Komandirlər Məktəbini, Moskvada Hərbi Akademiyanı bitirib.
1979-cu ildən SSRİ Silahlı Qüvvələri tərkibində vzvod, rota, batalyon komandiri və polk komandirinin müavini vəzifələrində xidmət edib.
1992-ci ildən Azərbaycan Silahlı Qüvvələrində briqada komandiri, korpus komandiri, cəbhə komandanının birinci müavini-Səhra İdarəetmə Qərargahının rəisi vəzifələrini tutub.
1993-cü il noyabrın 2-dən Silahlı Qüvvələrin Baş Qərargah rəisi-müdafiə nazirinin birinci müavini olub.
2020-ci il sentyabrın 27-də Azərbaycan Ordusu Qarabağ bölgəsində hərbi əməliyyatlara başlayandan bir müddət sonra Nəcməddin Sadıqovun adı Müdafiə Nazirliyinin rəsmi saytının “Rəhbərlik” bölməsindən çıxarılıb. Ancaq onun vəzifədən götürülməsi barədə hər hansı qərar indiyədək açıqlanmayıb.
