Ekspert bahalaşmaya diqqət çəkir
Dövlət Statistika Komitəsinin hesabatına görə, 2020-ci ildə istehlak məhsullarının və xidmətlərin qiymətləri 2019-cu ilə nisbətən 2,8 faiz yüksəlib. Ərzaq məhsulları, içkilər və tütün məmulatları üzrə 5 faiz inflyasiya getdiyi bildirilir.
İqtisadçı Qubad İbadoğlu şərh yayaraq minimum maaş, orta maaş və orta pensiya göstəriciləri fonunda bəzi ərzaq məhsullarının çox bahalaşmasına diqqət çəkib. Novator.az-ın məlumatına görə, o yazır ki, son bir ildə günəbaxan yağı 57,5 faiz, şəkər tozu 38,1 faiz, qarğıdalı yağı 37,3 faiz, un 14,9 faiz bahalaşıb.
Ekspert həmçinin qeyd edir ki, 2021-ci ilin yanvarında dizel yanacağı 33,3 faiz, Aİ-92 markalı avtomobil benzini 11,1 faiz dəyər artırıb.
Azərbaycanda minimum əməkhaqqı 250 manatdır.
Dövlət Statistika Komitəsi 2020-ci il dekabrın 1-nə Azərbaycanda muzdla çalışan işçilərin orta aylıq nominal əməkhaqqını 703,5 manat göstərib.
Əmək pensiyasının minimum məbləği 2019-cu il oktyabrın 1-dən 200 manat müəyyən olunub, 2020-ci ilin indeksləşdirməsi nəticəsində 233,2 manata çatıb.
