Mehmanxanaların gəlirləri 3,9 dəfə azalıb
Mehmanxana və mehmanxana tipli müəssisələrin fəaliyyəti haqqında rəsmi hesabat yayılıb. Novator.az-ın məlumatına görə, Dövlət Statistika Komitəsi bildirir ki, 2020-ci ildə Azərbaycanın mehmanxanalarında keçirilmiş gecələmələrin sayı 2019-cu illə müqayisədə 3,3 dəfə azalaraq 999,8 min olub: “Gecələmələrin 58 faizi Bakıda, 9,7 faizi Qəbələdə, 5,5 faizi Qusarda, 4,1 faizi Qubada, 3,2 faizi Lənkəranda, 3,1 faizi Naftalanda, 2,4 faizi Naxçıvan Muxtar Respublikasında, 1,9 faizi Şabranda, 1,2 faizi Mingəçevirdə, qalan hissəsi digər şəhər və rayonlardakı mehmanxanalarda qeydə alınıb.
Əcnəbilər və vətəndaşlığı olmayan şəxslərin mehmanxanalarda keçirdiyi gecələmələrin sayı 2019-cu illə müqayisədə 5,4 dəfə azalıb.
2020-ci ildə mehmanxanaların gəlirləri 2019-cu illə müqayisədə 3,9 dəfə azalaraq 116,8 milyon manat məbləğində rəsmiləşib”.
Azalmalar koronavirus pandemiyasını cilovlamaq üçün tətbiq olunan məhdudiyyətlərin nəticəsidir.
