İtaliyada hökumət böhranından çıxış yolu aranır.
Novator.az bildirir ki, hakim koalisiya parlamentdə çoxluğu itirdiyi üçün baş nazir Cüzeppe Konte yanvarın 26-da istefa verib.
2018-ci il martın 4-də parlamentin aşağı və yuxarı palatalarına keçirilmiş seçkidə Şimal Liqası ilə “5 ulduz” hərəkatı qalib gəlib. Həmin il iyunun 1-dən baş nazir postunu bu qurumların ortaq namizədi Cüzeppe Konte tutub.
2019-cu ilin avqust ayında Şimal Liqası koalisiyadan çıxıb, hökumət istefaya gedib. Sentyabrın 5-də Cüzeppe Konte yenidən hökumət qurub. “5 ulduz” hərəkatının, Demokrat Partiyasının, Azad və Bərabərlər Partiyasının təmsilçilərindən ibarət hökumətə daha sonra sabiq baş nazir Matteo Renzinin liderlik etdiyi Yaşayan İtaliya Partiyası da qoşulub. Bu il yanvarın 14-də Yaşayan İtaliya Partiyası koalisiyadan çıxıb.
Hökumətin taleyinə prezident Serco Mattarella aydınlıq gətirməlidir. Hazırda məsləhətləşmələr gedir, növbədənkənar parlament seçkisi istisna olunmur.
İtaliyada 2020-ci il sentyabrın 20-21-də keçirilmiş konstitusiya referendumunda parlamentin aşağı və yuxarı palataları ixtisar olunub. Aşağı palatada (Deputatlar Palatası) deputatların sayı 630-dan 400-ə, yuxarı palatada (Senat) senatorların sayı 315-dən 200-ə düşüb.
