Prezidentin işlər müdiri dəyişdi
Oqtay Şahbazov prezidentin işlər müdiri vəzifəsindən azad edilib. Dövlət başçısı İlham Əliyev sərəncamı yanvarın 26-da imzalayıb.
Digər sərəncamla Ramin Quluzadə prezidentin işlər müdiri postuna təyinat alıb.
Novator.az bildirir ki, Ramin Quluzadə 1977-ci ildə doğulub. Azərbaycan Dövlət İqtisad İnstitutunu bakalavr və magistr dərəcələri ilə bitirib.
2005-2015-ci illərdə Heydər Əliyev Fondunda fəaliyyət göstərib. 2015-ci il noyabrın 25-də rabitə və yüksək texnologiyalar nazirinin birinci müavini təyin olunub, həmçinin nazir vəzifəsini icra edib.
2016-cı il yanvarın 15-də rabitə və yüksək texnologiyalar naziri təyin olunub.
2017-ci il fevralın 13-dən 2021-ci il yanvarın 26-dək nəqliyyat, rabitə və yüksək texnologiyalar naziri postunu tutub.
Prezidentin işlər müdiri İşlər İdarəsinə rəhbərlik edir. İdarə prezidentin və onun administrasiyasının fəaliyyətinin maddi-texniki və maliyyə təminatı ilə məşğul olur.
Oqtay Şahbazov 1941-ci ildə doğulub. Azərbaycan Xarici Dillər Pedaqoji İnstitutunu bitirib.
Azərbaycan Nazirlər Sovetinin İşlər İdarəsində müxtəlif rəhbər vəzifələrdə çalışıb, Azərbaycan Kommunist Partiyası Mərkəzi Komitəsinin işlər müdiri olub. 1991-ci ildən prezidentin işlər müdirinin birinci müavini postunu tutub, 2016-ci ildə işlər müdiri vəzifəsinə keçirilib.
Onun oğlu Pərviz Şahbazov 2017-ci il oktyabrın 12-dən energetika naziridir.
