Mənzərədən gerçək mənzərəyə
Əmək və əhalinin sosial müdafiəsi naziri Sahil Babayev 2020-ci ildə Azərbaycanda orta pensiya məbləğinin 300 manata, yaşa görə pensiyanın orta məbləğinin 330 manata çatdığını bəyan edib.
Novator.az-ın məlumatına görə, iqtisadçı Rövşən Ağayev pensiyanın orta məbləğinin pensiya sistemi və pensiyaçıların real durumu barədə doğru informasiya vermədiyini yazır: “Azərbaycanda “elitar pensiyaçılar” təbəqəsi var. Söhbət yüksək maaş və təxminən 80%-lik əvəzləmə əmsalı ilə pensiya hüququ qazanan məmur, deputat korpusunun, hüquq mühafizə və hərbi sistemin təmsilçilərindən gedir. Bu təbəqə pensiyaçıların 20-30%-ni təşkil edir. Bu qrupla aşağı pensiyalı 70-80%-lik qrupun pensiya məbləğləri arasında kəskin fərq orta pensiya məbləğini şişirdir.
Ədalətli statistika nə olar? Əmək və Əhalinin Sosial Müdafiəsi Nazirliyi pensiyaçıların sayını pensiya məbləğini intervallara bölməklə açıqlasın. Məsələn, 200-220 manat, 221-250 manat, 250-300 manat, 300-400 manat, 400-500 manat, 500 manatdan yuxarı pensiya alanların sayı bilinsin. Median pensiya məbləğini, yəni pensiyaçıların ilk yarısı ilə ikinci yarısını birləşdirən pensiya məbləğini də açıqlamaq olar”.
Dövlət Statistika Komitəsinin məlumatına görə, 2021-ci ilin əvvəlinə Azərbaycanda pensiyaçıların sayı 1 milyon 232,2 min nəfər olub.
Əmək pensiyasının minimum məbləği 2019-cu il oktyabrın 1-dən 200 manat müəyyən olunub, 2020-ci ilin indeksləşdirməsi nəticəsində 233,2 manata çatıb.
Azərbaycanda əmək pensiyasının sığorta hissəsi orta aylıq nominal əməkhaqqının illik artım tempinə uyğun indeksləşdirilir.
