21-ci ilin vəzifələri
Nazirlər Kabinetinin 25 yanvar müşavirəsində 2021-ci ilin əsas vəzifələri müzakirə olunub.
Rəsmi məlumata görə, baş nazir Əli Əsədovun sədrliyi ilə keçirilən müşavirədə maliyyə naziri Samir Şərifov, iqtisadiyyat naziri Mikayıl Cabbarov, əmək və əhalinin sosial müdafiəsi naziri Sahil Babayev, ekologiya və təbii sərvətlər naziri Muxtar Babayev məruzələrlə çıxış ediblər.
2021-ci ilin prioritetləri sırasında bunlar var:
– işğaldan azad edilmiş ərazilərin bərpası zamanı hər bir iqtisadi rayonun təbii-iqlim şəraitinin və profilinin nəzərə alınması;
– Qarabağ bölgəsinin turizm marşrutlarının işlənib hazırlanmasına başlamaq;
– nəzərdə tutulmuş beynəlxalq hava limanlarının, yeni dəmir yolu xətlərinin tikintisi;
– işğaldan azad olunan ərazilərdə heyvandarlıq, bağçılıq, tərəvəzçilik, üzümçülük və taxılçılıq sahələrinin inkişafı;
– işğaldan azad edilmiş ərazilərdə torpaq islahatının aparılması üçün yeni mexanizm və meyarların işlənib hazırlanması;
– ölkə səviyyəsində su ehtiyatları ilə bağlı problemləri həll etməklə yanaşı işğaldan azad edilmiş torpaqların su ehtiyatlarından səmərəli istifadə məsələlərinə xüsusi diqqət yetirilməsi, azad edilmiş torpaqlarda ən müasir suvarma sistemlərinin yaradılması;
– azad edilmiş ərazilərin yaşıl enerji zonasına çevrilməsi, həmin ərazilərdə su elektrik stansiyalarının tikintisi imkanlarının da nəzərdən keçirilməsi;
– antikorrupsiya tədbirlərinin ardıcıl şəkildə davam etdirilməsi və bütün dövlət qurumlarını əhatə etməsi;
– iqtisadi artımın bərpa edilməsinə nail olmaq;
– inflyasiya meyillərinin qarşısını almaq;
– valyuta ehtiyatlarının səmərəli idarə edilməsi;
– maliyyə inzibatçılığının keyfiyyətini yüksəltmək, maliyyə intizamını gücləndirmək, nəzarət mexanizmləri sistemini təkmilləşdirmək;
– büdcə xərclərinin optimallaşdırılması, qənaət rejiminin tətbiq olunması, artıq və səmərəsiz xərclərin qarşısının alınması;
– dövlət satınalmalarının şəffaflığı və effektivliyinin təmin edilməsi;
– antiinhisar siyasətinin gücləndirilməsi, haqsız rəqabətə, xüsusilə də istehlak bazarında süni qiymət artımına yol verilməməsi.
