Dövlət Neft Şirkətinin (SOCAR) fəaliyyətinə ümumi rəhbərliyi və nəzarəti həyata keçirmək üçün Müşahidə Şurası yaradılıb. Prezident İlham Əliyevin 23 yanvar fərmanı ilə Müşahidə Şurasının sədr və daha 6 üzvdən ibarət olması müəyyən edilib.

Dövlət başçısının həmin gün imzaladığı sərəncamla Müşahidə Şurasına sədrlik iqtisadiyyat naziri Mikayıl Cabbarova həvalə olunub. Üzvlər bu şəxslərdir:

Emin Hüseynov – birinci vitse-prezidentin köməkçisi

İsrafil Məmmədov – Dövlət Neft Fondunun icraçı direktoru

Elnur Soltanov – energetika nazirinin müavini

Azər Bayramov – maliyyə nazirinin müavini

Rövşən Nəcəf – iqtisadiyyat nazirinin müavini

Ruslan Əlixanov – Azərbaycan İnvestisiya Holdinqinin baş icraçı direktoru.

Dövlət Neft Şirkətinə Rövnəq Abdullayev prezidentlik edir. Ötən il noyabrın 5-də qurum Azərbaycan İnvestisiya Holdinqinin idarəetməsinə verilib. Azərbaycan İnvestisiya Holdinqi prezidentin 7 avqust 2020-ci il fərmanı ilə yaradılıb. Publik hüquqi şəxs olan Azərbaycan İnvestisiya Holdinqi onun idarəetməsinə verilmiş dövlət şirkətlərinin və müəssisələrinin, dövlət payı olan təsərrüfat cəmiyyətlərinin vahid prinsiplər əsasında idarə edilməsi, fəaliyyətinin təkmilləşdirilməsi, o cümlədən həyata keçirdikləri investisiya proqramlarının şəffaflığının və iqtisadi səmərəsinin yüksəldilməsi, onların rəqabət qabiliyyətinin təmin olunması, maliyyə sağlamlığının və dayanıqlılığının yaxşılaşdırılması sahəsində fəaliyyət göstərir.

Qurumun Müşahidə Şurasına baş nazir Əli Əsədov sədrlik edir. Mətin Eynullayev İdarə Heyətinin sədri, Ruslan Əlixanov baş icraçı direktordur.

Dövlət Neft Şirkətinin mərkəzi ofisi Bakı şəhərində yerləşir. 2016-cı ildə istifadəyə verilən bina 40 mərtəbədən ibarətdir.