Qiymət həmin qiymət olacaq
Avropa Şurasının Yerli və Regional Hakimiyyətlər Konqresinin monitorinq qrupu fevralın 23-25-i Azərbaycanda yerli demokratiyanın vəziyyətini qiymətləndirəcək. Novator.az-ın məlumatına görə, ekspert Samir Əliyev yazır ki, koronavirus pandemiyası üzündən qiymətləndirmə distant şəkildə olacaq, monitorinq qrupunun üzvləri Azərbaycana səfər etməyəcəklər: “Monitorinq qrupu Azərbaycan hökumətinin Avropa Yerli Özünüidarə Xartiyasının tələblərini yerinə yetirmə səviyyəsini qiymətləndirmək üçün iki dəfə müşahidə aparıb. Monitorinqlərin nəticəsi olaraq Azərbaycan hökumətinə yerli özünüidarə sahəsində problemlərin həllini sürətləndirmək tövsiyələri verilib. 126 saylı ilk tövsiyə 2003-cü ilə, 326 saylı tövsiyə 2012-ci ilə təsadüf edib. Üçüncü monitorinq 2020-ci ildə olmalı idi, amma koronavirus pandemiyasının yayılması səbəbindən təxirə salınıb.
Sonuncu monitorinqdən ötmüş 9 il ərzində Azərbaycanda yerli özünüidarə institutunun güclənməsi, səlahiyyətlərinin artırılması istiqamətində müsbət heç nə baş verməyib. Bələdiyyələr yeri icra hakimiyyəti orqanlarının şöbəsi çərçivəsindən çıxa bilməyiblər. Ona görə də monitorinq qrupunun hesabatı və tövsiyəsi əvvəlkilərdən ciddi fərqlənməyəcək”.
Azərbaycanda bələdiyyə institutu 1999-cu ildən fəaliyyət göstərir. Yerli özünüidarə qurumlarına seçkilər 1999, 2004, 2009, 2014 və 2019-cu illərdə keçirilib.
Hazırda 1606 bələdiyyə var. Əhalisi 500-dən az ərazilərdə 5 bələdiyyə üzvü; 999-dək ərazilərdə 7 bələdiyyə üzvü; 4999-dək ərazilərdə 9 bələdiyyə üzvü; 9999-dək ərazilərdə 11 bələdiyyə üzvü; 19999-dək ərazilərdə 13 bələdiyyə üzvü; 49999-dək ərazilərdə 15 bələdiyyə üzvü; 99999-dək ərazilərdə 17 bələdiyyə üzvü; 299999-dək ərazilərdə 19 bələdiyyə üzvü seçilir.
Mövzu ilə bağlı:
Ekspert Azərbaycanda bələdiyyə islahatı təklif edir
Qafqazdakı bələdiyyələrin müqayisəli təhlili
