Nazirlər Kabineti kirayə mənzildə yaşamalı olan prokurorluq işçilərinə pul kompensasiyasının məbləği və verilməsi qaydasını yeniləyib. Qayda xidmət yeri dəyişdirilən və yaşayış yeri olmadığı üçün kirayə götürülmüş mənzildə yaşayan prokurorluq işçilərinə şamil olunur.

Novator.az bildirir ki, yenilənmiş sənədə görə, pul kompensasiyası prokurorluq işçilərinin ailə üzvlərini də əhatə edəcək. Prokurorluq işçilərinə və onların ailə üzvlərinə qulluq keçdiyi dövr ərzində müvəqqəti mənzilin kirayəsi üçün pul kompensasiyası hər ay bu məbləğdə ödənir:

Bakı şəhərində – 150 manat;

Gəncə, Naxçıvan, Sumqayıt, Xırdalan şəhərləri və Abşeron rayonunda – 100 manat;

başqa şəhər və rayon mərkəzlərində – 75 manat;

digər yaşayış məntəqələrində – 55 manat.

Dəyişikliyə əsasən, işçiyə onun hər bir ailə üzvünə görə müvafiq kompensasiyaların 50 faizi məbləğində əlavə pul kompensasiyası düşür.

Pul kompensasiyasının verilməsi üçün prokurorluq işçisinin qulluq etdiyi müvafiq prokurorluq orqanının yerləşdiyi ərazidə onun və yetkinlik yaşına çatmış ailə üzvlərinin mülkiyyətində mənzilin (yaşayış sahəsinin) olmaması şərtdir.

Prokurorluq işçisinin ailə tərkibində dəyişiklik baş verdikdə o, rəhbərliyə məruzə etməli və pul kompensasiyasının verilməsi ilə bağlı müvafiq sənədləri təqdim etməlidir.

Baş Prokurorluğun xidməti mənzillə (digər yaşayış sahəsi ilə) təmin etdiyi prokurorluq işçilərinə müvəqqəti mənzilin kirayəsi üçün pul kompensasiyası ödənmir.