İqtisadi Zonaların İnkişafı Agentliyi yaradılır
Prezident İlham Əliyev “Sumqayıt Kimya Sənaye Parkı” Məhdud Məsuliyyətli Cəmiyyətinin əsasında İqtisadiyyat Nazirliyinin tabeliyində İqtisadi Zonaların İnkişafı Agentliyi yaratmaq fərmanı verib. Yanvarın 22-də imzalanan fərmana görə, İqtisadi Zonaların İnkişafı Agentliyi sənaye parklarının (Balaxanı Sənaye Parkı istisna olmaqla), sənaye məhəllələrinin (Naxçıvan Muxtar Respublikasında yaradılan sənaye məhəllələri istisna olmaqla) və aqroparkların fəaliyyətinin təşkili, onların idarə olunması və inkişafı ilə bağlı tədbirlər hazırlayan, həyata keçirilməsini təmin edən, o cümlədən bu istiqamətdə göstərilən dövlət dəstəyi tədbirlərində iştirak edən publik hüquqi şəxsdir.
Agentliyin fəaliyyətinə ümumi rəhbərliyi və nəzarəti həyata keçirmək üçün 7 üzvdən ibarət Müşahidə Şurası yaradılır; cari rəhbərliyi 5 üzvdən ibarət İdarə Heyəti həyata keçirir.
Müşahidə Şurasının 4 üzvünü İqtisadiyyat Nazirliyi, 3 üzvünü bu dövlət qurumları (hər qurumdan bir nəfər olmaqla) təyin edirlər: Kənd Təsərrüfatı Nazirliyi; “Azərişıq” Açıq Səhmdar Cəmiyyəti; Azərbaycan Meliorasiya və Su Təsərrüfatı Açıq Səhmdar Cəmiyyəti.
Müşahidə Şurası sədrinin və İdarə Heyəti üzvlərinin təyinatı iqtisadiyyat nazirinə həvalə olunub.
Nazirlər Kabineti iki ay müddətində agentliyin nizamnaməsinin layihəsini, habelə nizamnamə fondunun miqdarı barədə təkliflərini, “Aqroparklar haqqında nümunəvi əsasnamə”nin layihəsini hazırlamalıdır.
