Hər adam 465,6 manat qazanıb
2021-ci il yanvarın 1-nə Azərbaycanda iqtisadi fəal əhalinin sayı 5 milyon 252,5 min nəfər olub, onların 4 milyon 876,6 min nəfəri məşğul əhali kimi rəsmiləşib. Novator.az-ın məlumatına görə, hesabatı yayan Dövlət Statistika Komitəsi muzdla çalışan işçilərin sayını 2020-ci il dekabrın 1-nə 1 milyon 684,5 min nəfər göstərir, iqtisadiyyatın neft-qaz sektorunda 33,9 min, qeyri neft-qaz sektorunda 1650,6 min nəfərin çalışdığını bildirir.
Açıqlamaya əsasən, 2021-ci il yanvarın 1-nə statistik vahidlərin (fərdi sahibkarlar istisna olmaqla) sayı 155435-ə çatıb, hüquqi şəxs yaratmadan sahibkarlıq fəaliyyəti ilə məşğul olan rəsmi fərdi sahibkarların sayı 1 milyon nəfəri ötüb.
Qeyd olunur ki, 2020-ci ildə dövlət büdcəsinin gəlirləri 24 milyard 673,1 milyon manat, xərcləri 26 milyard 417,1 milyon manat olub, 1 milyard 744 milyon manatlıq kəsir yaranıb.
2020-ci ildə ölkə əhalisinin gəlirlərinin əvvəlki ilə nisbətən nominal ifadədə 1,8 faiz azaldığı vurğulanır: əhalinin hər nəfərinə düşən gəlirlər ayda orta hesabla 465,6 manat olub.
