Azərbaycanda 15 və yuxarı yaşlı əhalinin hər 1000 nəfərindən 973-nün ali, orta ixtisas və orta təhsili var. Novator.az-ın məlumatına görə, Dövlət Statistika Komitəsi belə hesabat yayıb.

Rəsmi açıqlamada qeyd olunur ki, 2021-ci il yanvarın 1-nə ölkənin 1684 dövlət və 156 qeyri-dövlət məktəbəqədər təhsil müəssisəsində 129 min uşaq tərbiyə alıb.

2020-2021-ci tədris ilinin əvvəlinə ölkənin 4397 dövlət və 34 qeyri-dövlət ümumi təhsil müəssisələrində (hazırlıq sinifləri daxil olmaqla) 1,7 milyon şagirdin oxuduğu vurğulanır. Sağlamlıq imkanları məhdud olan 6,4 min uşağın təhsil aldığı 16 xüsusi məktəb və ya ümumi təhsil müəssisələrində xüsusi siniflər də fəaliyyət göstərib.

2020-2021-ci tədris ilinin əvvəlinə 113 dövlət liseyi və gimnaziyasında 79,2 min nəfər şagird oxuyub, 61 orta ixtisas təhsil müəssisəsində 60 min tələbə təhsil alıb.

Bakalavr və magistrlərin hazırlanmasını həyata keçirən 40 dövlət və 12 qeyri-dövlət ali təhsil müəssisəsində, eləcə də 26 elmi təşkilatda təhsil alanların sayı 198,7 min nəfər göstərilir.

2020-2021-ci tədris ilinin əvvəlinə xarici ölkələrdə dövlət xətti ilə təhsil alan tələbələrin sayı 975 nəfər olub.

2021-ci ilin əvvəlinə ölkədə müxtəlif elmi-texniki xidmətləri həyata keçirən 132 elmi təşkilat və müəssisə fəaliyyət göstərib. Bu elm ocaqlarındakı mütəxəssislərin 37,4 faizinin elmlər doktoru və ya fəlsəfə doktoru elmi dərəcəsi var.