Sosial təminat hesabatı
Dövlət Statistika Komitəsinin məlumatına görə, 2021-ci ilin əvvəlinə Azərbaycanda pensiyaçıların sayı 1 milyon 232,2 min nəfər olub, 412 min nəfər sosial müavinət, 289 min nəfər prezident təqaüdü alıb.
2020-ci ildə 91 min nəfərə birdəfəlik müavinət ödəndiyi bildirilir.
Rəsmi hesabata əsasən, 2021-ci il yanvarın 1-dən prezident təqaüdlərinin aylıq məbləğləri artırılaraq Azərbaycanın Milli Qəhrəmanı adı verilmiş şəxslər üçün 1800 manata, şəhid, Əfqanıstanda SSRİ qoşunlarının tərkibində həlak olan, itkin düşmüş və məhkəmə qaydasında ölmüş elan edilən hərbi qulluqçuların ailələri üçün 500 manata, müharibə və ya 1990-cı ilin 20 Yanvar hadisələri ilə əlaqədar I dərəcə əlilliyi olan şəxslər üçün 400 manata, II dərəcə əlilliyi olan şəxslər üçün 350 manata, III dərəcə əlilliyi olan şəxslər üçün 300 manata, 1941-1945-ci illər Böyük Vətən müharibəsi iştirakçıları, İkinci Dünya müharibəsi dövründə Leninqrad şəhərinin mühasirəsi zamanı şəhərin müəssisələrində, idarə və təşkilatlarında işləmiş və “Leninqradın müdafiəsinə görə” medalı, “Leninqrad mühasirəsində yaşayan” döş nişanı ilə təltif edilmiş şəxslər üçün 300 manata, ümumi səbəblərdən l dərəcə əlilliyi olan şəxslər üçün (gözdən əlilliyi olan şəxslər istisna olmaqla) 130 manata çatıb.
Vətən Müharibəsi Qəhrəmanı adı verilmiş şəxslərə və ümumi səbəblərdən I dərəcə gözdən əlilliyi olan şəxslərə prezident təqaüdləri təsis edilib. 2021-ci yanvarın 1-dən onların aylıq məbləğləri 2000 və 210 manatdır.
Əmək kitabçasında müvafiq qeydiyyat aparılan əsas iş yeri üzrə elmi müəssisə və təşkilatlarda və ya təhsil müəssisələrində azı 25 il çalışmış, elmi dərəcəsi olan, işləməyən, əmək pensiyası hüququ olan şəxslərə prezident təqaüdü rəsmiləşib və 2021-ci yanvarın 1-dən onun aylıq məbləği elmlər doktoru elmi dərəcəsinə görə 200 manat, fəlsəfə doktoru elmi dərəcəsinə görə isə 120 manat müəyyən edilib.
2021-ci il yanvarın 1-dən aylıq məbləği övladlığa götürülən uşağa görə 160 manat, sağlamlıq imkanları məhdud 18 yaşınadək uşağa görə 480 manat olmaqla sosial müavinət rəsmiləşib.
2021-ci ilin əvvəlinə 77,3 min aztəminatlı ailənin 324 min üzvü ünvanlı dövlət sosial yardımı alıb və onun bir nəfərə düşən orta aylıq məbləği 57,1 manat olub.
