Məhbus cəbhəçiyə yeni ittihamlar
AXCP üzvü, partiya sədri Əli Kərimlinin ictimai əsaslarla mühafizəçisi Niyaməddin Əhmədova yeni ittihamlar irəli sürülüb.
Novator.az bildirir ki, Niyaməddin Əhmədov 2020-ci il aprelin 16-sı Bakıda tutularaq 30 sutka inzibati həbsə məhkum edilib. İnzibati həbs cəzası başa çatandan sonra Niyaməddin Əhmədov cinayət məsuliyyətinə cəlb olunub, barəsində həbs qətimkan tədbiri seçilib.
Baş Prokurorluğun mətbuat xidmətinin 19 may 2020-ci il məlumatına əsasən, Məmmədov Qabil Əmrah oğlunun Azərbaycan ərazisində 2015-2017-ci illərdə törətdiyi külli miqdarda özgə əmlakını ələ keçirmə cinayət əməllərinə görə məsuliyyətdən yayınmaq məqsədilə Almaniyada sığınacaq alaraq Azərbaycanda terrorçuluğa hazırlıq və terrorçuluğa açıq çağırışlar etməsinə əsaslı şübhələr müəyyən olunub: “Cinayət işinin istintaqı zamanı Qabil Məmmədovun əvvəllər konkret cinayət əməllərinə görə məhkum edilmiş həmfikirləri və havadarları ilə qabaqcadan əlbir olduğu qrupda gizli təşkilatlanıb Azərbaycanda ictimai təhlükəsizliyi pozmaq, əhali arasında vahimə yaratmaq, dövlət hakimiyyət orqanlarının qərar qəbul etməsinə təsir göstərmək məqsədilə terror aktları törətmək üçün 2019-cu ildə sosial şəbəkələr vasitəsilə yayımladığı çoxsaylı çıxışlarında özünə tərəfdar bildiyi və dəstək verəcəklərini güman etdiyi həmfikirlərinə müraciət edərək silahlanıb mümkün kütləvi aksiyaların gedişində Azərbaycanın hakimiyyət orqanlarının yüksək vəzifəli şəxslərini, o cümlədən ictimai asayişi qoruyan polis əməkdaşlarını qətlə yetirmək, onların evlərini yandırmaqla terrorçuluğun törədilməsinə yönələn açıq çağırışlar etməsinə əsaslı şübhələr müəyyənləşdirilib.
Aparılmış istintaqla həmin materialları internet resurslarında yaymaqla nəzərdə tutulmuş cinayətlərin hazırlanması və törədilməsində istifadə edilməsi məqsədilə dövlətə və hakimiyyətə qarşı cinayət əməllərində dəstəklənməsinə etibar etdiyi şəxslərə, o cümlədən yaxından tanıdığı həmyerlisi Əhmədov Niyaməddin Arif oğluna müxtəlif üsullarla göndərdiyi pul vəsaitlərini verməsinə, sonuncunun isə öz növbəsində terrorçuluğun maliyyələşdirilməsində istifadə olunacağını bilib həmin pul vəsaitlərini qəbul edərək uydurma ünvanlar adı altında qəsdən toplamaqla terrorçuluğun maliyyələşdirilməsi cinayətini törətməsinə əsaslı şübhələr müəyyən edilib. Qabil Məmmədovun çıxışlarında bəyan etdiyi terrorçuluğun törədilməsinə yönələn cinayət əməlləri iradəsindən asılı olmayan səbəblərdən başa çatdırılmayıb.
Barəsində həbs qətimkan tədbiri seçilməklə axtarışda olan Qabil Məmmədova Cinayət Məcəlləsinin müvafiq maddələri ilə ittiham elan olunub, onun Azərbaycana ekstradisiyası üzrə müvafiq hüquqi prosedurlar həyata keçirilir. Niyaməddin Əhmədov isə Cinayət Məcəlləsinin 214-1-ci (Terrorçuluğu maliyyələşdirmə) maddəsi ilə təqsirləndirilən şəxs qismində cəlb olunaraq barəsində məhkəmənin qərarı ilə həbs qətimkan tədbiri seçilib”.
“Azadlıq” radiosu bildirir ki, 2021-ci il yanvarın 19-da Niyaməddin Əhmədova Cinayət Məcəlləsinin 233-1 (Qanunla mülki dövriyyədə olmasına yol verilməyən (mülki dövriyyədən çıxarılmış) əşyaları qanunsuz olaraq hazırlama, əldə etmə, saxlama, daşıma, gəzdirmə, başqasına vermə və ya satma) və 281-ci (Dövlət əleyhinə yönələn açıq çağırışlar) maddələri ilə əlavə ittihamlar elan edilib.
Qeyd olunur ki, Baş Prokurorluğun İstintaq İdarəsində aparılan ibtidai istintaq başa çatmaq üzrədir: “Niyaməddin Əhmədovla bağlı araşdırmalar yekunlaşıb. Cəbhəçi Almaniyada sığınacaq almış Qabil Məmmədov və onun xanımı Aytən Ramazanova ilə əlbirlikdə ittiham olunur”.
Yanvarın 19-da atası Arif Əhmədov Niyaməddinə baş çəkib. O, atasına deyib ki, heç bir cinayət törətməyib, ittihamda yazılanlar doğru deyil.
AXCP də Niyaməddin Əhmədova qarşı ittihamları əsassız və absurd saydığını bəyan edib.
Cəzası bitən cəbhəçi azadlığa çıxmayıb
Cəbhəçiyə cinayət işi qaldırılıb
Niyaməddin Əhmədovun həbsi ilə bağlı rəsmi məlumat
