Dövlət Statistika Komitəsi bildirir ki, 2020-ci ildə Azərbaycanın pərakəndə ticarət şəbəkəsində 21,7 milyard manatlıq ərzaq məhsulları, içkilər və tütün məmulatları, 18,5 milyard manatlıq qeyri-ərzaq malları satılıb, 2019-cu illə müqayisədə dövriyyə real ifadədə 1,3 faiz, o cümlədən qeyri-ərzaq malları üzrə 6,1 faiz azalıb, ərzaq məhsulları, içkilər və tütün məmulatları üzrə 3,4 faiz artıb.
Rəsmi hesabata görə, istehlaka xərclənən vəsaitin 48,6 faizi ərzaq məhsullarının, 5,4 faizi içkilər və tütün məmulatlarının, 16 faizi toxuculuq məhsulları, geyim və ayaqqabıların, 5,4 faizi elektrik malları və mebellərin, 5,1 faizi avtomobil benzini və dizel yanacağının, 1,8 faizi əczaçılıq məhsulları və tibbi ləvazimatların, 0,9 faizi kompüterlər, telekommunikasiya avadanlıqları və çap məhsullarının, 16,8 faizi digər qeyri-ərzaq mallarına sərf edilib.
Ticarət şəbəkəsində bir ölkə sakininin orta hesabla ayda 181,2 manatlıq ərzaq məhsulları, içkilər və tütün məmulatları, 154,4 manatlıq qeyri-ərzaq malları aldığı vurğulanır.
Novator.az-ın məlumatına görə, Dövlət Statistika Komitəsi qeyd edir ki, 2020-ci ilin yanvar-noyabr aylarında xarici ticarət dövriyyəsi 2019-cu ilin eyni dövrü ilə müqayisədə faktiki qiymətlərlə 27,2 faiz, real ifadədə 21,7 faiz, o cümlədən idxal 36,2 faiz, ixrac 11,5 faiz azalıb.
Qeyri neft-qaz məhsullarının ixracında faktiki qiymətlərlə 8 faiz, real ifadədə 17,9 faiz azalma qeydə alındığı bildirilir.
Başqa bir açıqlamaya əsasən, ötən il 72 milyard 432,2 milyon manatlıq, 2019-cu illə müqayisədə 4,3 faiz az ümumi daxili məhsul (ÜDM) istehsal olunub, iqtisadiyyatın qeyri neft-qaz sektorunda əlavə dəyər 2,6 faiz, neft-qaz sektorunda 7 faiz geriləyib.
Hesabata görə, ÜDM istehsalının 33,7 faizi sənaye, 11,5 faizi ticarət; nəqliyyat vasitələrinin təmiri, 7,7 faizi tikinti, 7,1 faizi nəqliyyat və anbar təsərrüfatı, 6,9 faizi kənd təsərrüfatı, meşə təsərrüfatı və balıqçılıq, 2 faizi informasiya və rabitə, 1,2 faizi turizm və ictimai iaşə sahələrinin, 20,2 faizi digər sahələrin payına düşüb.
Məhsula və idxala xalis vergilər ümumi daxili məhsulun 9,7 faizi həcmində, əhalinin hər nəfərinə düşən ÜDM 7262,8 manat göstərilir.
