20-ci ildə 26004 cinayət qeydə alınıb
Yanvarın 18-i Daxili İşlər Nazirliyində 2020-ci ilin yekunlarına və cari ildə qarşıda duran vəzifələrə həsr olunmuş kollegiya iclası keçirilib. Rəsmi məlumata görə, video formatlı iclasda çıxış edən nazir, general-polkovnik Vilayət Eyvazov deyib ki, 2020-ci ildə ümumilikdə 26004 cinayət qeydə alınıb, onların 86,7 faizi böyük ictimai təhlükə törətməyən və az ağır cinayətlər olub: “Hər 100 min nəfərə cinayətlərin sayı 8 fakt azalaraq 257-yə düşüb, 2019-cu illə müqayisədə qəsdən sağlamlığa az ağır zərərvurma, mülkiyyət əleyhinə cinayətlər, o cümlədən oğurluq, soyğunçuluq, quldurluq, dələduzluq, avtonəqliyyat vasitələrinin qaçırılması kimi cinayətlər azalıb. Cinayətlərin 85,5 faizinin, eləcə də keçmiş illərdən bağlı qalmış 310 cinayətin üstünün açılması təmin edilib.
102 zəng xidmətinə daxil olan məlumatlar üzrə görülmüş operativ tədbirlərlə 2288, “Təhlükəsiz şəhər” sisteminin imkanları ilə 477 cinayətin üstü açılıb, axtarışda olan 94 avtomobil saxlanıb.
254 kriminal qrup zərərsizləşdirilib, odlu silah saxlayan və daşıyan 161 şəxs cinayət məsuliyyətinə cəlb olunub. Qanunsuz dövriyyədən 1 ton 873 kiloqram narkotik vasitə çıxarılıb, yabanı halda yetişən 153 tondan çox narkotik xassəli bitki aşkarlanaraq məhv edilib”.
