Xaricdəki Azərbaycan
Novator.az Azərbaycanın xarici ölkələrdəki diplomatik təmsilçilik statistikası ilə maraqlanıb.
Xarici İşlər Nazirliyinin Mətbuat Xidməti İdarəsi saytın sorğusunu cavablandıraraq bəyan edib ki, Azərbaycanın 59 ölkədə səfirliyi xidmətdədir, daha 11 ölkədə təmsilçilik ofisi fəaliyyət göstərir.
Rəsmi açıqlamaya görə, Azərbaycan dövləti 5 beynəlxalq təşkilatda daimi nümayəndəliklə təmsil olunur, ölkənin 9 baş konsulluğu, 14 fəxri konsulluğu var.
Novator.az bildirir ki, 2021-ci ildə Azərbaycanın dövlət müstəqilliyinin 30 ili tamam olur.
Dövlət müstəqilliyinin bərpası 1991-ci ildə üç mərhələdən keçib: avqustun 30-da parlament dövlət müstəqilliyinin bərpa olunması haqqında bəyannamə, oktyabrın 18-də dövlət müstəqilliyi haqda konstitusiya aktı qəbul edib, dekabrın 29-da akt ümumxalq səsverməsi ilə təsdiqlənib.
Azərbaycan Respublikasını ilk tanıyan dövlət Türkiyədir: rəsmi Ankaranın qərarı 9 noyabr 1991-ci ildə bəyan edilib. Həmin ilin dekabrında bir çox dövlət, o cümlədən Pakistan, İran, İsrail, Böyük Britaniya, Avstraliya, Hindistan, Çin, İndoneziya, İspaniya, Yaponiya eyni addımı atıblar.
İtaliya, Fransa, Almaniya, ABŞ və başqa bir çox dövlət Azərbaycanı 1992-ci ilin yanvar-fevral aylarında tanıyıblar.
1992-ci il martın 2-də Azərbaycan BMT üzvlüyünə qəbul edilib.
Hazırda Azərbaycanın 160-a yaxın ölkə ilə ikitərəfli münasibətləri var.
