Sənaye müəssisələri və bu sahədə fəaliyyət göstərən fərdi sahibkarlar 2020-ci ildə 37,1 milyard manatlıq və ya 2019-cu illə müqayisədə 5 faiz az sənaye məhsulu istehsal edib. Dövlət Statistika Komitəsi bildirir ki, azalma neft-qaz sektorunda məhsul istehsalının 6,9 faiz düşməsinin nəticəsi olub, sənayenin qeyri neft-qaz sektorunda isə məhsul istehsalı 12,5 faiz artıb.

Hesabata görə, ötən il sənaye məhsulunun 61,3 faizi mədən sektorunda, 32,5 faizi emal sektorunda, 5,3 faizi elektrik enerjisi, qaz və buxar istehsalı, bölüşdürülməsi və təchizatı sektorunda, 0,9 faizi su təchizatı, tullantıların təmizlənməsi və emalı sektorunda istehsal olunub.