Ədliyyə Nazirliyi ötən ilə yekun vurub
Yanvarın 15-də Ədliyyə Nazirliyinin video formatında geniş kollegiya iclası keçirilib. Rəsmi məlumata görə, iclasda bildirilib ki, 2020-ci ildə nazirlik 1800-dək qanunvericilik aktı layihəsi hazırlayıb, 3300-ə yaxın akt hüquqi ekspertizadan keçirilib, 3,9 milyon notariat hərəkəti rəsmiləşdirilib, 290 mindən çox vətəndaşlıq vəziyyəti aktları dövlət qeydiyyatına alınıb: “Bu əməliyyatlarla bağlı 7 milyon manat vəsait, daşınmaz əmlakla əlaqədar müqavilələr üzrə isə 36 milyon manatdan çox vergi dövlət büdcəsinə köçürülüb. 7 siyasi partiya, habelə 145 qeyri-kommersiya qurumu dövlət qeydiyyatına alınıb, 45 mətbu nəşr uçota götürülüb”.
409 min icra sənədinin icrasının təmin edildiyi, 700 milyon manat vəsaitin fiziki və hüquqi şəxslərə, habelə vergi borcları üzrə büdcəyə ödətdirildiyi qeyd olunub.
Hesabata əsasən, Məhkəmə Ekspertizası Mərkəzində 41 ekspert ixtisası üzrə 35 minə yaxın işə baxılıb, bələdiyyələrin 77 mindən çox aktı inzibati nəzarət qaydasında yoxlanıb, qanunsuz ayrılmış 8200 hektardan artıq torpaq sahələri geri qaytarılıb, cinayət xarakterli 23 fakt üzrə materiallar prokurorluğa göndərilib.
