Naxçıvanın illik hesabatı
Naxçıvan Muxtar Respublikasının Dövlət Statistika Komitəsi illik sosial-iqtisadi hesabat yayıb. Novator.az bildirir ki, rəsmi açıqlamaya görə, 2020-ci ildə muxtar respublikada 2,9 milyard manatlıq ümumi daxili məhsul istehsal olunub, bu da 2019-cu ilə nəzərən müqayisəli qiymətlər üzrə 1,1 faiz çoxdur.
Adambaşına ümumi daxili məhsul 6310,4 manat göstərilir.
2019-cu illə müqayisədə sənayedə 1,4 faiz, kənd təsərrüfatında 4,6 faiz (hər iki sahədə müqayisəli qiymətlər üzrə), sərmayə qoyuluşunda 1,1 faiz, informasiya və rabitə xidmətlərində 5,2 faiz yüksəlişin qeydə alındığı vurğulanır.
Qeyd olunur ki, nəqliyyat sektorunda yük daşınması 2019-cu ilə nəzərən 1,2 faiz, pərakəndə əmtəə dövriyyəsi 0,2 faiz, əhaliyə göstərilən ödənişli xidmətlər 0,5 faiz (sonuncu iki sahədə müqayisəli qiymətlər üzrə) geriləyib.
2019-cu illə müqayisədə xarici ticarət dövriyyəsində 2,7 faiz, ixracda 0,7 faiz, idxalda 14,7 faiz artımın qeydə alındığı bildirilir.
Hesabata əsasən, 2020-ci il dekabrın 1-nə muxtar respublika iqtisadiyyatında orta aylıq əməkhaqqı 531,7 manat olub.
