İqtisadçı bahalı layihəyə qarşı
Bakının Nizami rayonunda, Heydər Əliyev prospekti, 109-da Mərkəzi Banka 32 mərtəbəli yeni inzibati bina tikiləcək. Layihənin dəyərinin 218 milyon avro (450 milyon manat) olduğu bildirilir.
Novator.az-ın məlumatına görə, iqtisadçı, Azərbaycan Demokratiya və Rifah Hərəkatının sədri Qubad İbadoğlu bunu israfçılıq sayır. O, müqayisə aparıb yazır ki, Rusiya Mərkəzi Bankı ikimərtəbəli, Ukrayna və İsveçrə Mərkəzi bankları dördmərtəbəli, Belarus Mərkəzi Bankı beşmərtəbəli binalarda qərar tutur: “Azərbaycanda Mərkəzi Banka 160 metr hündürlüyü olan 32 mərtəbəli inzibati bina tikiləcək və hər mərtəbəyə 14 milyon 62 min manat xərclənəcək. Binanın sahəsi 67926 kvadratmetr olacaq, bu hesabla da hər kvadratmetrin tikintisinə 6625 manat məsrəf ediləcək. Hələ qarşıda binanın komplektləşdirilməsi, mebellə təchizatı və digər xərclər var.
Rəsmi bərpa planına görə, işğaldan azad edilmiş ərazilərdə tikiləcək mənzillərin hər kvadratmetrinin smeta dəyəri 350 manat nəzərdə tutulur. Bu hesabla təkcə Mərkəzi Bankın binasının tikintisinə xərclənəcək 450 milyon manat vəsaitlə Qarabağda ümumilikdə 1 milyon 287 min 714 kvadratmetr yaşayış sahəsi olan mənzillər və hər biri 85 kvadratmetrlik 15 min 149 ev tikmək mümkündür.
450 milyon manat vəsaitlə 5000 min istedadlı Azərbaycan gəncinin dünyanın ən nüfuzlu universitetlərində 2 illik magistr təhsilinin xərclərini ödəmək, onların yaşayış xərclərini tam şəkildə qarşılamaq, bununla da beynəlxalq standartlara cavab verən 5000 kadr hazırlamaq olar.
Pandemiya ilə əlaqədar olaraq dünyanın hətta maliyyə və biznes mərkəzlərində ofislər boşdur, əmlak hər gün dəyər itirir, böyük şirkətlərin və dövlət orqanlarının işçiləri evdən çalışır, belə bir vəziyyətdə 450 milyon manat dövlət vəsaitini ofis binasının tikintisinə xərcləmək anlaşılmazdır”.
