Vidadi Muradov vəzifədən çıxarıldı
Yanvarın 10-da sərəncam imzalayan prezident İlham Əliyev Vidadi Aydın oğlu Muradovu “Azərxalça” Açıq Səhmdar Cəmiyyətinin İdarə Heyətinin sədri vəzifəsindən azad edib. 1956-cı il təvəllüdlü Vidadi Muradov həmin postu 2016-ci il iyunun 10-dan tuturdu.
Baş Prokurorluğun 9 yanvar məlumatına görə, Vidadi Muradova xüsusilə külli miqdarda ziyan vurmaqla mənimsəmə, vəzifə səlahiyyətlərindən sui-istifadə ağır nəticələrə səbəb olduqda və vəzifə saxtakarlığı maddələri ilə ittiham elan edilib, məhkəmə qərarı ilə barəsində həbs qətimkan tədbiri seçilib.
İstintaqı Baş Prokuror yanında Korrupsiyaya Qarşı Mübarizə Baş İdarəsi aparır.
Novator.az bildirir ki, Moskva Kooperativ İnstitutunu bitirən Vidadi Muradov 1980-ci ildən müxtəlif müəssisələrdə iqtisadçı kimi fəaliyyət göstərib. 1994-cü ildə “Azər-İlmə” Elmi-Tədqiqat və İstehsalat Mərkəzini təsis edib, 2016-cı ilədək “Azər-İlmə” MMC-nin direktoru olub.
Əməkdar incəsənət xadimi, “Şöhrət” ordeni laureatı, tarix elmləri doktoru, professor, hakim Yeni Azərbaycan Partiyasının üzvüdür.
