Baş Prokurorluq hesabat verib
Yanvarın 8-i Baş Prokurorluqda 2020-ci ildə görülmüş işlərin və qarşıda duran vəzifələrin müzakirəsinə həsr olunan əməliyyat müşavirəsi keçirilib. Rəsmi məlumata görə, müşavirədə çıxış edən baş prokuror Kamran Əliyev deyib ki, 2020-ci ildə korrupsiya hüquqpozmasına yol vermiş 281 şəxs barəsində 180 cinayət işinin istintaqı tamamlanaraq məhkəmələrə göndərilib, 49 milyon 153 min manat məbləğində ziyanın ödənməsi təmin edilib, 13 milyon 283 min manat dəyərində əmlak üzərinə həbs qoyulub.
Məruzəyə əsasən, il ərzində xidməti fəaliyyətində nöqsanlara yol verən 30 prokurorluq işçisi intizam məsuliyyətinə alınıb, onların 2-si prokurorluqdan xaric olunub, 8 nəfər vəzifədən çıxarılıb, 15 nəfərə töhmət və ya şiddətli töhmət verilib, 5 nəfərə digər intizam tənbehi tədbiri tətbiq edilib.
