Sosial şəbəkə nəhəngləri Trampın hesablarını bağladı
ABŞ-da Konqres binasına hücumdan sonra “Twtter” və “Facebook” sosial şəbəkələri prezident Donald Trampın hesablarını bağlayıb.
Novator.az saytı ABŞ-ın “Vaşinqton Post” qəzetinə istinadla xəbər verir ki, ilk addımı “Twtter” şəbəkəsinin rəhbərliyi atıb. Şəbəkə prezidentin “Twtter” hesabını 12 saatlığa bağladığını elan edib. Eyni zamanda Trampın həmin vaxta qədər yazdığı üç açıqlaması (tvitləri) şəbəkədən silinib.
“Twtter”in rəhbərliyi bəyan edib ki, Donald Tramp prezident seçkisinin saxtalaşdırıldığı haqda əsassız ittihamlarını və əhalini iğtişaşlara çağırmağını davam etdirsə, onun bu şəbəkədəki hesabı birdəfəlik bağlanacaq.
Az sonra “Facebook” şəbəkəsi də Trampın hesabını bağladığını açıqlayıb. ABŞ prezidentinin “Facebook”dakı səhifəsi 24 saatlığa bağlanıb. “Twtter”dən fərqli olaraq “Facebook” rəhbərliyi səhifənin birdəfəlik bağlana biləcəyi haqda xəbərdarlıq etməyib.
Trampın “İnstagram” səhifəsi də bağlanıb. Bu qərarı da “Facebook” rəhbərliyi verib. “İnstagram” şəbəkəsi “Facebook”a tabedir.
“Vaşinqton Post” yazır ki, sosial şəbəkə nəhəngləri ilk dəfədir ABŞ prezidentinə qarşı belə bir sərt addım atır.
Yanvarın 6-da ABŞ Konqresi prezident seçkisi ilə bağlı yekun qərar verməli, Senat və Nümayəndələr Palatasının iclasında Demokratlar Partiyasından Cozef Baydenin qələbəsi təsdiqlənməli idi. Lakin həmin gün prezident Donald Trampın bir qrup tərəfdarı paytaxt Vaşinqtonda yerləşən Konqresin binasını ələ keçirərək bu prosesi pozub. Həm Konqresdə, həm şəhər boyu polislə qarşıdurma yarandığı üçün paytaxtda komendant saatı elan edilib.
2020-ci il noyabrın 3-də keçirilmiş ümumxalq səsverməsində Cozef Bayden 538 nəfərlik Seçicilər Kollegiyasına 306, Respublikaçılar Partiyasının namizədi olan Donald Tramp 232 nümayəndə qazanıb. Qələbə üçün 270 səs kifayətdir.
Dekabrın 14-də Seçicilər Kollegiyasında səsvermə də Cozef Baydenin qələbəsi ilə başa çatıb – 306: 232.
Donald Tramp və tərəfdarları bir çox ştatda seçkinin nəticələrinin saxtalaşdırıldığını iddia edir.
Mənbə: Washingtonpost.com
