Yeni təhlil və koordinasiya qurumu yaradıldı
Prezident İlham Əliyev İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi publik hüquqi şəxs yaradılmasına fərman verib. Yanvarın 6-da imzalanan fərmana görə, Dördüncü Sənaye İnqilabının Təhlili və Koordinasiya Mərkəzi Azərbaycan Respublikası ilə Dördüncü Sənaye İnqilabı sahəsində fəaliyyət göstərən beynəlxalq təşkilatlarla əməkdaşlığı və bu sahədə əlaqələndirməni, habelə rəqəmsal iqtisadiyyat üzrə çağırışların, təşəbbüslərin, strategiyaların və layihələrin təhlilini və koordinasiyasını həyata keçirir.
Mərkəzin fəaliyyətinə ümumi rəhbərlik və nəzarət məqsədilə 3 üzvdən ibarət Müşahidə Şurası yaradılır, cari rəhbərliyi icraçı direktor həyata keçirir.
Müşahidə Şurasının sədrinin və digər üzvlərinin, icraçı direktorun vəzifəyə təyin və vəzifədən azad edilməsi İqtisadiyyat Nazirliyinə həvalə olunub.
Mərkəzin saxlanması və fəaliyyətinin təmin edilməsi, o cümlədən müvafiq beynəlxalq öhdəliklərdən irəli gələn xərclərinin ödənməsi dövlət büdcəsinin vəsaiti, habelə əldə edilən gəlir, ianələr, qrantlar və qanunla qadağan olunmayan digər mənbələr hesabına həyata keçirilir.
Nazirlər Kabinetinə mərkəzin fəaliyyətinin təşkili üçün maddi-texniki təminat məsələlərini iki ay müddətində həll etmək, İqtisadiyyat Nazirliyinə qurumun nizamnaməsini, strukturunu, əməyin ödənişi fondunu, işçilərinin say həddini və əmək haqlarının məbləğini (vəzifə maaşını, vəzifə maaşına əlavələri, mükafatları və digər ödənişləri) bir ay müddətində təsdiq etmək tapşırılıb.
Qanuna görə, publik hüquqi şəxs dövlət və bələdiyyə adından yaradılan, ümumdövlət və (və ya) ictimai əhəmiyyət daşıyan fəaliyyətlə məşğul olan, dövlət və ya bələdiyyə orqanı olmayan təşkilatdır.
