20-ci ilə nöqtə VİDEO
Yanvarın 6-da prezident İlham Əliyev 2020-ci ilin yekunlarına həsr olunmuş müşavirə keçirib. AZƏRTAC xəbər verir ki, İlham Əliyev video formatlı müşavirədə Azərbaycan torpaqlarının işğaldan qurtulmasını 2020-ci ilin əsas uğuru adlandırıb: “Azərbaycan 44 gün ərzində tarixi qələbə qazanaraq öz torpaqlarını azad edib, düşmənə sarsıdıcı zərbələr endirib. Bizim şanlı Qələbəmiz bizim güclü iradəmizi, xalqımızın güclü əzmini bütün dünyaya nümayiş etdirdi”.
Prezident 2020-ci ildə ölkədə parlament seçkisinin keçirildiyini, siyasi partiyalarla dialoqun gücləndiyini, kadr islahatlarının davam etdirildiyini vurğulayıb, həmçinin koronavirus pandemiyasının fəsadlarının aradan qaldırılması istiqamətində görülən işlərə toxunub.
Dövlət başçısı qeyd edib ki, ötən il iqtisadiyyat 4 faizdən bir qədər çox azalsa da, qeyri-neft sənayesi 11 faizdən çox irəli gedib, kənd təsərrüfatı, orta aylıq əməkhaqqı və pensiyalar artıb, valyuta ehtiyatları qorunub.
Prezident deyib ki, Cənub Qaz Dəhlizi, onun son seqmenti olan TAP tam istismara verilib, tarixdə ilk dəfə olaraq Azərbaycan qazı Avropa məkanındadır.
Müşavirədə məruzələr dinlənilib.
Ermənistan 1988-1994-cü illərin təcavüzündə Azərbaycanın bütün cənub-qərbini işğal edib.
Azərbaycan Ordusunun 2020-ci il sentyabrın 27-dən apardığı hərbi əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, həmin rayonların, eləcə də Xocavənd, Xocalı, Laçın, Ağdərə bölgələrinin bir çox kəndi və qəsəbəsi azad olunub.
Noyabrın 10-da hərbi əməliyyatlar dayandırılıb. Ermənistan dekabrın 1-dək Ağdam, Kəlbəcər və Laçın rayonlarını Azərbaycana qaytarıb.
Yuxarı Qarabağın böyük hissəsi işğalda, Laçın şəhəri və rayonun bir neçə kəndi atəşkəsi qorumağa məsul olan Rusiya hərbçilərinin nəzarətindədir.
