Anar Kərimov mədəniyyət naziri təyin edildi
Prezident İlham Əliyev yanvarın 5-də sərəncam imzalayaraq Anar Kərimovu mədəniyyət naziri təyin edib.
Novator.az bildirir ki, Anar Kərimov 1977-ci ildə doğulub. Bakı Dövlət Universitetində şərqşünas ixtisası üzrə bakalavr dərəcəsi, Dövlət İdarəçilik Akademiyasında beynəlxalq münasibətlər və diplomatiya ixtisası üzrə magistr dərəcəsi alıb.
2000-ci ildən Xarici İşlər Nazirliyinin İnsan Haqları, Demokratikləşmə və Humanitar Məsələlər İdarəsində attaşe, üçüncü katib postlarını tutub. 2004-cü ildən Azərbaycanın Belçikadakı səfirliyinin və Avropa İttifaqında nümayəndəliyinin üçüncü və ikinci katibi olub. 2008-2009-cu illərdə Xarici İşlər Nazirliyinin humanitar və sosial məsələlər şöbəsində birinci katib vəzifəsində çalışıb.
2010-cu ildən Azərbaycanın YUNESKO yanında daimi nümayəndəliyinin müşaviri, müvəqqəti işlər vəkili vəzifələrində xidmət edib, 2014-cü ilin may ayında daimi nümayəndə təyin olunub.
2020-ci il iyulun 20-də mədəniyyət nazirinin birinci müavini postuna gətirilən Anar Kərimov həmin gündən nazirin səlahiyyətlərini icra edirdi.
Mədəniyyət Nazirliyi 1953-cü ildə yaradılıb. 2006-2018-ci illərdə Mədəniyyət və Turizm Nazirliyi adı daşıyıb.
