2823 şəhid
Vətən müharibəsində şəhid olmuş hərbi qulluqçuların siyahısı yenilənib. Müdafiə Nazirliyinin təqdim etdiyi siyahıda dekabrın 28-dək dəfn edilmiş 2823 nəfərin adı yer alır.
Rəsmi məlumatda bildirilir ki, itkin düşmüş sayılan 30-dan çox hərbi qulluqçunun tapılması və şəxsiyyəti müəyyən olunmayan 50-dən çox şəxsin tanınması işləri davam etdirilir.
Ermənistan 1988-1994-cü illərin təcavüzündə Azərbaycanın bütün cənub-qərbini işğal edib.
2020-ci il sentyabrın 27-dən Azərbaycan Ordusunun apardığı əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, bu rayonların, eləcə də Xocavənd, Xocalı, Laçın rayonlarının, keçmiş Ağdərə rayonunun bir çox məntəqəsi azad olunub.
Noyabrın 10-da hərbi əməliyyatlar dayandırılıb. Noyabrın 20-də Ağdam rayonu, noyabrın 25-də Kəlbəcər rayonu, dekabrın 1-də Laçın rayonu Azərbaycana qaytarılıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun böyük hissəsi işğalda qalır.
Laçın şəhəri və rayonun bir neçə kəndi bölgədə atəşkəsi qorumağa məsul olan Rusiya Ordusu bölmələrinin nəzarətindədir.
