Realliq.info saytının baş redaktoru İkram Rəhimov Nərimanov Rayon Məhkəməsinin qərarı ilə azadlığa buraxılıb. Dekabrın 25-də yayılan xəbərə görə, jurnalistin cəzasının çəkilməmiş hissəsi azadlıqdan şərti məhrumetmə ilə əvəzlənib. O, paytaxtdakı 10 saylı Cəzaçəkmə Müəssisəsində saxlanırdı.

İkram Rəhimovu 2018-ci il oktyabrın 26-da Dövlət Təhlükəsizliyi Xidməti həbs edib. Rəsmi məlumatda qeyd olunub ki, İkram Rəhimov tabeçiliyində olan şəxslərlə birlikdə Realliq.info və digər “reket” informasiya saytları yaradıb, həmin internet qəzetlərin jurnalistləri adı altında ayrı-ayrı vətəndaşların barəsində rüsvayedici və böhtan xarakterli məlumatları mətbu orqanlarında müntəzəm yayıb dayandırılması müqabilində pul tələb edərək alıb, bu üsulla müxtəlif idarə və təşkilatlarda çalışan şəxslərdən, sahibkarlardan müntəzəm haqq toplayıb.

Bakı Ağır Cinayətlər Məhkəməsi 2019-cu il iyunun 12-də İkram Rəhimova 5 il 6 aylıq azadlıqdan məhrumetmə cəzası kəsib. Jurnalist bir qrup şəxslə qabaqcadan əlbir olaraq hədə-qorxu ilə tələb etmədə, bu əməlin təkrar törədilməsində təqsirli bilinib. 2019-cu il sentyabrın 18-də Bakı Apellyasiya Məhkəməsi İkram Rəhimovun həbs cəzasını 3 ilə endirib.