Naxçıvan: rəsmi statistika nə göstərir?
Naxçıvan Muxtar Respublikasının Dövlət Statistika Komitəsinin hesabatına görə, 2020-ci ilin yanvar-noyabr aylarında bölgədə 2 milyard 556 milyon 981 min 800 manatlıq ümumi daxili məhsul istehsal olunub: “Ümumi daxili məhsulun tərkibində ilk yeri 967 milyon 182 min 300 manatlıq dəyərlə sənaye sahəsi tutur.
11 ayda əsas kapitala 948 milyon 959 min 900 manat vəsait yönəldilib, sərmayənin 94,8 faizi tikinti-quraşdırma işlərinin payına düşüb.
Yanvar-noyabr aylarında 458 milyon 7 min 200 manatlıq kənd təsərrüfatı məhsulları istehsal olunub, informasiya və rabitə xidmətləri 52 milyon 39 min 200 manat dəyərində rəsmiləşib.
Muxtar respublikanın bank və kredit təşkilatları 11 ayda hüquqi və fiziki şəxslərə 164 milyon 795 min 700 manat məbləğində kredit verib.
Bölgədə 384 növdə məhsul istehsal olunur, əhalinin 350 növdə məhsula olan tələbatı yerli imkanlar hesabına ödənir.
Dekabrın 1-nə bölgədə bank hesablarının sayı 91728-ə çatıb, bunun 87,2 faizi aktiv hesablardır.
Yanvar-noyabr aylarında 450 milyon 839 min 200 ABŞ dolları dəyərində xarici ticarət dövriyyəsi qeydə alınıb. İxracın dəyəri 387 milyon 539 min 900 dollar olub, 324 milyon 240 min 600 dollar dəyərində müsbət saldo yaranıb.
Noyabrın 1-nə muxtar respublika iqtisadiyyatında bir işçiyə hesablanmış orta aylıq əməkhaqqı 529,8 manat olub”.
