Gürcü Arzusu yeni hökumət qurdu
Gürcüstan parlamenti dekabrın 24-ü axşam yeni hökumətin tərkibini təsdiqləyib. Novator.az-ın məlumatına görə, hakim Gürcü Arzusu – Demokratik Gürcüstan Partiyasının qurduğu hökuməti səsverməyə qatılan 85 deputatın hamısı dəstəkləyib.
Georgi Qaxariyanın baş nazirlik etdiyi hökumətdə 11 nəfər yer alır:
David Zalkaliani – xarici işlər naziri
İrakli Qaribaşvili – müdafiə naziri
Qoça Lortkipanidze – ədliyyə naziri
Vaxtanq Qomelauri – daxili işlər naziri
İvane Maçavariani – maliyyə naziri
Natiya Turnava – iqtisadiyyat və davamlı inkişaf naziri
Levan Davitaşvili – ətraf mühit və kənd təsərrüfatı naziri
Mayya Skitişvili – regional inkişaf və infrastruktur naziri
Mixail Çxenkeli – təhsil, elm, mədəniyyət və idman naziri
Yekaterina Tikaradze – məcburi köçkünlərlə iş, əmək, səhiyyə və sosial müdafiə naziri
Teya Axvlediani – barışıq məsələləri və vətəndaş bərabərliyi üzrə dövlət naziri.
Gürcü Arzusu – Demokratik Gürcüstan Partiyası bu il iki turda – oktyabrın 31-i və noyabrın 21-də keçirilmiş parlament seçkisini udub, 150 yerlik qanunverici orqanda 90 mandata sahib çıxıb. Hökumət qurmaq üçün 76 mandat kifayətdir.
Baş nazir Georgi Qaxariya 1975-ci ildə doğulub. Hökumətə 2019-cu il sentyabrın 8-dən rəhbərlik edir.
Gürcü Arzusu – Demokratik Gürcüstan Partiyası 2012-ci ildə yaradılıb, həmin il və 2016-cı ildə keçirilmiş parlament seçkilərində çoxluq əldə edərək hökumət qurub.
Mənbə: Sputnik-georgia.ru
