Ekspertin nazirə sualları var
Əmək və əhalinin sosial müdafiəsi naziri Sahil Babayev son iki il ərzində Azərbaycanda əməkhaqqı fondunun 77-78 faiz artdığını bəyan edib. Onun sözlərinə görə, bunun əsas səbəblərindən biri biznes dairələrinin həm qeyri-formal iqtisadiyyatın azaldılması, həm əmək müqavilələrinin, əməkhaqqı fondunun leqallaşdırılması çağırışlarına müsbət cavab verməsidir.
Nazirin açıqlamasını şərh edən iqtisadçı Rövşən Ağayev bir neçə sual qoyub. Novator.az bildirir ki, ekspert özünün “Facebook” səhifəsində sualları belə sıralayır:
“Söhbət bütövlükdə iqtisadiyyat üzrə əməkhaqqı fondunun artımından gedir, ya yalnız özəl sektor üzrə?
Artımdan əvvəl əməkhaqqı fondu mütləq məbləğdə nə qədər olub, hazırda nə qədərdir?
Əməkhaqqı fondu 77-78 faiz artıbsa, milli hesablar sistemində əməkhaqqı gəlirlərinin ümumi daxili məhsula nisbəti necə dəyişib?
77-78 faizlik artım “ağarma”nın nəticəsidirsə, bu, gizli iqtisadiyyatın səviyyəsində nə qədər leqallaşmaya səbəb olub?
İqtisadiyyat naziri Mikayıl Cabbarov da gizli iqtisadiyyatda azalma baş verdiyini deyir. Amma azalma nə qədər olub, gizli iqtisadiyyat hansı səviyyədə idi, azalmadan sonra hara düşüb, bununla bağlı hər hansı açıqlama yoxdur.
77-78 faiz çox parlaq rəqəmdir, amma gərək baza məlumatları ilə birgə təqdim edilsin ki, hər kəs açıqlanan statistikanın şəffaflığına da əmin olsun. Həm də bu məlumatlar olmadan 77-78 faiz özlüyündə nəyisə ifadə etmir”.
