Xarici və daxili borc, borca xidmət
2021-ci ilin dövlət büdcəsi layihəsini təqdim edən Maliyyə Nazirliyi xarici dövlət borcu məsələsinə də toxunub. Novator.az-ın məlumatına görə, təqdimatda bildirilir ki, 2020-ci il iyulun 1-nə Azərbaycanın birbaşa xarici dövlət borcu 8 milyard 213,2 milyon ABŞ dolları olub: “Altı ayda birbaşa xarici dövlət borcu ilin əvvəli ilə müqayisədə 106,8 milyon dollar məbləğində azalıb, amma borcun ümumi daxili məhsula (ÜDM) nisbəti 17,3 faizdən 19,5 faizə yüksəlib.
Xarici borc portfelinin 62,7 faizi sabit, 37,3 faizi dəyişkən faiz dərəcəsi ilə olan borclardır. Borcun 42,5 faizi 10 ilə qədər müddətdə, 51,5 faizi 10 ildən 20 ilə qədər müddətdə, 6 faizi 20 ildən yuxarı müddətdə qaytarılmalıdır.
Ümumi məbləğin 82 faizi ABŞ dollarında, 8,3 faizi avroda, 4,6 faizi Beynəlxalq Valyuta Fondunun xüsusi borcalma hüquqlarında, 3,9 faizi Yaponiya yenində, 1,3 faizi digər valyutalarda cəlb olunub.
Dövlət müəssisələrinin cəlb etdiyi xarici borclara verilmiş zəmanətlər üzrə 745 milyon dollar məbləğində şərti öhdəliklər nəzərə alınmaqla Azərbaycanın xarici borcu 2020-ci il iyulun 1-nə 8 milyard 958,2 milyon dollar, ÜDM-in 21,3 faizinə bərabər olub”.
Təqdimatda daxili dövlət borcunun ümumi məbləği 1 milyard 450,1 milyon manat göstərilir və qeyd edilir ki, 2021-ci ilin büdcəsində dövlət borclarına xidmətlə bağlı xərclər üçün 2 milyard 198,8 milyon manat məbləğində vəsait nəzərdə tutulur: “2021-ci il üzrə daxili dövlət borclanmasının yuxarı həddinin 1 milyard 300 milyon manat, xarici dövlət borclanmasının yuxarı həddinin 1 milyard 200 milyon manat və il ərzində veriləcək dövlət zəmanətlərinin məbləğinin yuxarı həddinin 1 milyard manat məbləğində olması təklif edilir”.
