100 manat necə xırdalanır? (Büdcəyə baxış)
İqtisadçı alim Qubad İbadoğlu 2021-ci ilin dövlət büdcəsi layihəsindəki rəqəmlərə diqqət çəkib.
Layihədə gəlirlər 25 milyard 427 milyon manat, xərclər 28 milyard 543 milyon manat göstərilir. Novator.az-ın məlumatına görə, Qubad İbadoğlu yazır ki, büdcə proqnozunda gəlirlərin hər 100 manatından 54 manat 20 qəpiyi neft sektorunun, 45 manat 80 qəpiyi qeyri-neft sektorunun çiynindədir. Layihədə neft sektoru üzrə daxilolmaların hər 100 manatından 88 manat 60 qəpiyi Dövlət Neft Fondundan köçürmə, 11 manat 40 qəpiyi vergi orqanlarının xətti ilə ödənişlər kimi verilir.
Qeyri-neft sektoru üzrə daxilolmaların hər 100 manatından 48 manat 70 qəpiyi vergi, 33 manat 50 qəpiyi gömrük orqanlarının payına düşür.
Büdcə xərclərinin hər 100 manatından 23 manat 40 qəpiyi müdafiə və milli təhlükəsizlik, məhkəmə hakimiyyəti, hüquq mühafizə orqanlarının və prokurorluğun saxlanması xərcləri, 17 manat 64 qəpiyi tikinti və şəhərsalma xərcləri, o cümlədən 7 manat 70 qəpiyi işğaldan azad olunmuş ərazilərin yenidən qurulması və bərpası üzrə vəsait, 14 manat 57 qəpiyi ümumi dövlət xidməti xərcləri, o cümlədən 7 manat 70 qəpiyi dövlət borcu üzrə ödənişlər, 12 manat 90 qəpiyi sosial müdafiə və sosial təminat, 11 manat 50 qəpiyi təhsil, 4 manat 90 qəpiyi səhiyyə, 3 manat 30 qəpiyi kənd təsərrüfatı, 1 manat 50 qəpiyi mədəniyyət, incəsənət, informasiya, bədən tərbiyəsi, gənclər siyasəti və bu qəbildən olan digər fəaliyyət, 96 qəpiyi ətraf mühitin mühafizəsi, 60 qəpiyi elm xərcləri üçün nəzərdə tutulub”.
