Qrip təhlükəlidir, yoxsa koronavirus? Suala cavab tapıldı
Dünyada koronavirus infeksiyası yayılandan bunun mövsümi qrip və ya soyuqdəymə kimi bir xəstəlik olduğunu iddia edənlər az deyil.
Hətta belə iddianı irəli sürənlər arasında dövlət başçıları da var: ABŞ-da Donald Tramp, Braziliyada Jair Bolsonaru koronavirusu qrip və soyuqdəymə ilə müqayisə edənlərdəndir.
Novator.az saytı Almaniyanın “Deutsche Welle” kanalına istinadla xəbər verir ki, alimlər bu iddiaları araşdırıblar.
Tədqiqat koronavirus diaqnozu ilə xəstəxanaya yerləşdirilən pasiyentlər arasında ölüm sayının xəstəxanalarda qripdən müalicə alan pasiyentlər arasında baş vermiş ölümlərin sayından üç dəfə çox olduğunu üzə çıxarıb.
Tədqiqat zamanı Fransa dövlətinin təqdim etdiyi, bu ilin mart-aprel aylarında COVİD-19 diaqnozu ilə xəstəxanaya yerləşdirilən 89 min 530 pasiyent haqda məlumat 2018-ci ilin sonundan 2019-cu il fevralın ayının sonunadək mövsümi qripdən xəstəxanalarda müalicə alan pasiyentlər haqda məlumatlarla müqayisə edilib. Aydın olub ki, həmin pasiyentlərdən koronavirusa yoluxanların 16,9 faizi, qripə yoluxanların isə 5,8 faizi vəfat edib.
Bundan başqa, koronavirus xəstələrinin 16,3 faizinin, qrip xəstələrinin 10,8 faizinin intensiv terapiyaya ehtiyac duyduğu, intensiv terapiya müddətinin koronavirusa yoluxanlar üçün orta hesabla 15 gün, qripə yoluxanlar üçün isə 8 gün davam etdiyi aydınlaşıb.
Tədqiqatın nəticəsi “Lancet Respiratory Medicine” jurnalında dərc edilib.
Mənbə: DW.com
