Büdcə layihəsi: hara nə qədər xərclənəcək?
2021-ci ilin dövlət büdcəsinin layihəsi Milli Məclisə təqdim olunub. Maliyyə Nazirliyinin yaydığı layihədə gəlirlər 25 milyard 427 milyon manat, xərclər 28 milyard 543 milyon manat nəzərdə tutulur. Cari xərclər ümumi xərclərin 63,1 faizi, əsaslı xərclər 29,2 faizi həcmində, dövlət borcuna xidmətlə bağlı xərclər 7,7 faizi həcmində göstərilir.
Sosial xərclər (əməyin ödənişi, pensiya və müavinətlər, dərman, sarğı ləvazimatları və materiallarının, ərzaq məhsullarının alınması xərcləri) 11 milyard 111,9 milyon manat məbləğində proqnozlaşdırılır.
Layihəyə əsasən, dövlət büdcəsi kəsirinin yuxarı həddi 3 milyard 116 milyon manat məbləğində olacaq.
Novator.az bildirir ki, iqtisadi fəaliyyətə 5 milyard 947,4 milyon manat, müdafiə və milli təhlükəsizlik sektoruna 4 milyard 585,8 milyon manat, ümumi dövlət xidmətlərinə 4 milyard 159,7 milyon manat, sosial müdafiə və sosial təminata 3 milyard 692,7 milyon manat, təhsilə 3 milyard 277,6 milyon manat, məhkəmə hakimiyyəti, hüquq mühafizə və prokurorluğa 2 milyard 92,8 milyon manat, səhiyyəyə 1 milyard 409 milyon manat, kənd təsərrüfatına 943 milyon manat, mədəniyyət, incəsənət, informasiya, bədən tərbiyəsi, gənclər siyasəti və bu qəbildən olan digər fəaliyyətə 418,1 milyon manat, ətraf mühitin mühafizəsinə 275,5 milyon manat, mənzil və kommunal təsərrüfatına 262,8 milyon manat, əsas bölmələrə aid edilməyən xərclərə 1 milyard 478,1 milyon manat yönəltmək nəzərdə tutulur.
Dövlət Neft Fondunun büdcəyə köçürəcəyi vəsait 12,2 milyard manat məbləğində rəsmiləşir. 7 milyard 250 milyon manat Dövlət Vergi Xidmətinin, 3 milyard 900 milyon manat Dövlət Gömrük Komitəsinin üzərinə düşür.
Büdcə zərfinə daxil olan digərə sənədlərə gəlincə, Dövlət Sosial Müdafiə Fondunun gəlir və xərcləri 5 milyard 146 milyon manat, işsizlikdən sığorta fondunun gəlir və xərcləri 157,7 milyon manat nəzərdə tutulur.
Ünvanlı dövlət sosial yardımının təyinatı üçün ehtiyac meyarının həddi 170 manat, yaşayış minimumu ölkə üzrə 196 manat götürülür.
