Əmanət layihələri prezidentə göndərildi
Dekabrın 18-də Milli Məclis əmanətlərin sığortalanması üzrə qanun layihələrini üçüncü – son oxunuşda qəbul edərək imzalanmaq üçün prezidentə göndərib.
Novator.az bildirir ki, bir layihəyə görə, 2016-cı ildən qüvvədə olan “Əmanətlərin tam sığortalanması haqqında” qanunun tətbiq müddəti 2021-ci il aprelin 5-dək uzadılır.
Hazırda tam sığortalanma qaydası illik faiz dərəcəsi milli valyutada 12 faizdən, xarici valyutada 2,5 faizdən yüksək olmayan əmanətləri əhatə edir.
Başqa layihəyə – “Əmanətlərin sığortalanması haqqında” qanunda dəyişikliklərə əsasən, fiziki şəxslərin qorunan əmanətləri üzrə kompensasiya məbləği 30 min manatdan 100 min manata (xarici valyutada 100 min manat ekvivalentinədək) artırılır.
Həmçinin sahibkarlıq fəaliyyəti ilə məşğul olan fiziki şəxslərin bank hesablarında olan vəsaitlərin maksimum 20 min manatı, notariusların depozit hesablarında qalmış, fiziki şəxslərə məxsus pul vəsaitləri tam məbləğdə sığortalanır.
Qanunda dəyişikliklər rəsmiləşsə, 5 aprel 2021-ci ildən qüvvəyə minəcək.
