Sərmayə və kredit açıqlamaları
Novator.az sərmayə və kredit rəqəmlərinə nəzər salıb. Dövlət Statistika Komitəsinin hesabatına görə, 2020-ci ilin yanvar-noyabr aylarında Azərbaycanın iqtisadi və sosial sahələrinə 12,7 milyard manat vəsait yönəldilib: “Ümumi sərmayənin 65,9 faizi məhsul istehsalı sahələrinin, 25 faizi xidmət sahələrinin, 9,1 faizi yaşayış evlərinin tikintisinin payına düşüb, vəsaitin 41,1 faizini dövlət, 58,9 faizini qeyri-dövlət sektorunun sərmayədarları qoyub”.
Əsas kapitala yönəldilmiş sərmayədə müəssisə və təşkilatların vəsaitləri 7 milyard 363,6 milyon manat, büdcə vəsaitləri 3 milyard 79,5 milyon manat, bank kreditləri 862,6 milyon manat, əhalinin şəxsi vəsaitləri 782,4 milyon manat, büdcədənkənar dövlət fondlarının vəsaitləri 204,8 milyon manat, başqa vəsaitlər 423,7 milyon manat göstərilir.
Xarici müəssisə və təşkilatların əsas kapitala 4 milyard 586,1 milyon manat vəsait qoyduğu, bunun 86,7 faizinin Böyük Britaniya, Türkiyə, ABŞ, Yaponiya, İsveçrə, Malayziya, Norveç, Rusiya və İran sərmayədarlarına məxsus olduğu vurğulanır.
Başqa hesabata görə, noyabrın 1-nə ölkənin bank və digər kredit təşkilatlarının kredit portfeli milli valyuta ekvivalentində 14 milyard 785,9 milyon manat olub, ödəmə vaxtı keçmiş kreditlərin məbləği ümumi kredit portfelinin 6,8 faizini təşkil edib.
