Büdcəsiz də mümkün…
Maliyyə Nazirliyi 2021-ci ilin dövlət büdcəsinin layihəsini sentyabrın 15-də Nazirlər Kabinetinə təqdim edib, sənəd sentyabrın 23-də təsdiqlənərək prezidentə göndərilib. Gəlirləri 24,3 milyard manat, xərcləri 25,8 milyard manat məbləğində proqnozlaşdırılan layihə hələ parlament müzakirəsinə çıxarılmayıb.
Novator.az-ın məlumatına görə, iqtisadçı Rövşən Ağayev bununla bağlı şərhində yazır ki, büdcə layihəsi oktyabrın 15-dək parlamentə təqdim edilməli, dekabrın 20-dək qanunverici orqanda təsdiqlənməlidir: “Hər iki təqvim pozulub. Amma “Büdcə sistemi haqqında” qanun bu tip vəziyyətləri sığortalayır. Qanunun 15.4-cü maddəsinə əsasən, növbəti büdcə ili üzrə dövlət büdcəsinin layihəsi müəyyən olunmuş müddət ərzində təsdiq olunmadıqda müvafiq icra hakimiyyəti orqanı dövlət büdcəsi təsdiq olunanadək hər ay üzrə ötən ilin xərclərinin on ikidə biri qədərində (müdafiə olunmuş xərc maddələri üzrə tam) maliyyələşmənin aparılmasının müvəqqəti qaydalarını müəyyənləşdirir. Eyni qayda büdcədənkənar dövlət fondlarının idarəetmə və əməliyyat xərclərinə də şamil edilir.
Həmçinin “Büdcə sistemi haqqında” qanunu təsdiqləyən prezident fərmanına görə, müvəqqəti maliyyələşmənin aparılması qaydasının müəyyən edilməsi dövlət başçısının səlahiyyətinə aiddir. Bu müddəalar göstərir ki, nəzəri və hüquqi olaraq gələn ilə büdcə təsdiq edilmədən də daxil olmaq mümkündür”.
