Rəsmi partiyaların sayı 62-yə çatdı
Dekabrın 15-də Ədliyyə Nazirliyinin Kollegiyası Gələcək Azərbaycan Partiyasını dövlət qeydiyyatına alıb. Bununla rəsmi partiyaların sayı 62-yə yüksəlib.
Novator.az bildirir ki, əsası 2013-cü ildə qoyulmuş Gələcək Azərbaycan Partiyasına Ağasif Şakiroğlu sədrlik edir. Partiya 2020-ci ildə rəsmiləşən 7-ci siyasi qurumdur. Apreldə Azad Demokratlar Partiyası (sədri Sülhəddin Əkbərdir) və Yeni Zaman Partiyası (sədri Musa Ağayevdir), mayda Cümhuriyyət Xalq Partiyası (sədri Bədrəddin Quliyevdir) və Müstəqil Xalq Partiyası (sədri Əflan İbrahimovdur), sentyabrda Milli Cəbhə Partiyası (sədri Razi Nurullayevdir) və Respublikaçı Alternativ Partiyası (sədri İlqar Məmmədovdur) qeydiyyata götürülüb.
Azərbaycanda siyasi partiyanın qeydiyyatı üçün azı 1000 vətəndaş onun üzvü olmalıdır.
“Siyasi partiyalar haqqında” qanun 1992-ci il iyunun 3-də qəbul edilib. Həmin il 10 partiya, 1993-ci ildə 8 partiya, 1994-cü ildə 5 partiya, 1995-ci ildə 7 partiya, 1998 və 1999-cu illərin hər birində 3 partiya, 2000-ci ildə 2 partiya, 2002-ci ildə 4 partiya, 2005-ci ildə 8 partiya, 2007-ci ildə 2 partiya, 2008, 2009 və 2011-ci illərin hər birində 1 partiya rəsmiləşib.
