İqtisadçı iki məsələ qaldırır
İqtisadçı Qubad İbadoğlu iki sosial məsələyə diqqət çəkib. Novator.az-ın məlumatına görə, ekspert özünün “Facebook” səhifəsində yazır: “I və II dərəcə əlilliyi olan şəxslərə, ahıllara baxıcılar qulluq edir. Hazırda I dərəcə əlilliyi olan şəxslərə və sağlamlıq imkanları məhdud 18 yaşınadək uşaqlara qulluq edən şəxslərə ayda 50 manat prezident təqaüdü verilir. Təbii ki, ayda 50 manat ödəniş bu ağır iş üçün azdır. Bir çox hallarda baxıcılar xidməti əlavə ödəniş müqabilində həyata keçirirlər.
Dekabrın 14-dən sərt karantin rejimi çərçivəsində SMS icazə sistemi qüvvəyə minib. Əlilliyi olan şəxslərə və ahıl vətəndaşlara qulluq edənlərin xidmət göstərməsi üçün evdən çıxmağa ayrılan 3 saat zaman kifayət etmir. Nazirlər Kabineti fəaliyyətinə icazə verilən istiqamətlər arasına əlilliyi olan və ahıl vətəndaşlara qulluq istiqamətini salmayıb. Baxıcılar öhdələrində düşən işi 3 saat müddətində görə bilmirlər. Bundan da ən çox əziyyət çəkən koronavirus pandemiyasında risk qrupuna daxil olan yaşı 65-dən yuxarı vətəndaşlar və I dərəcə əlillərdir.
Həlli vacib olan problemlərdən biri də çoxmənzilli binalarda yaşayan Vətən müharibəsi qaziləri ilə bağlıdır. Müharibədən sağlamlığını itirib qayıdan gənclərin bir çoxunun yaşadıqları mənzilə giriş-çıxış imkanları çətinləşib. Onlar hərəkətə məhdudiyyət yaratmayan uyğun mənzillərlə, eyni zamanda nəqliyyat vasitələri ilə təmin olunmalıdır.
Ümid edirəm ki, Əmək və Əhalinin Sosial Müdafiəsi Nazirliyi hər iki məsələni diqqətdə saxlayıb ən qısa zamanda onların həllinə nail olacaq”.
