Mülki əhaliyə nə qədər yardım veriləcək?
Prezident İlham Əliyev Ermənistanın Azərbaycana son təcavüzündə mülki əhaliyə dəymiş ziyanın ödənməsinə dair sərəncam imzalayıb. Dekabrın 14-də verilmiş sərəncama əsasən, mülki əhalinin əmlakına dəymiş ziyanla bağlı bu məbləğlərdə maddi yardım ödənəcək:
– dağıdılmış və ya qəzalı vəziyyətə düşmüş yaşayış evləri üzrə məişət əşyalarına dəymiş ziyanla bağlı hər bir ailəyə 6000 manat, şəxsi əşyalara dəymiş ziyanla bağlı hər bir ailə üzvünə 1500 manat;
– digər ziyan dəymiş yaşayış evləri üzrə hər bir ailəyə 1000 manat.
Baş Prokurorluğun rəsmi hesabatına görə, Ermənistan silahlı qüvvələrinin sentyabrın 27-dən başlayaraq Azərbaycanın yaşayış məntəqələrini atəşə tutması nəticəsində 94 mülki şəxs həlak olub, 414 nəfər xəsarət alıb, 3410 yaşayış evi, 120 çoxmənzilli bina, 512 mülki obyekt dağılıb.
Prezident İlham Əliyevin 6 noyabr sərəncamı ilə mülki əhaliyə, dövlət əmlakına, o cümlədən infrastruktur obyektlərinə, habelə sahibkarlıq fəaliyyəti subyektlərinə dəymiş ziyanın qiymətləndirilməsini və aradan qaldırılmasını təmin etmək məqsədilə dövlət komissiyası yaradılıb. Komissiyaya baş nazir Əli Əsədov sədrlik edir.
Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib.
2020-ci il sentyabrın 27-dən Azərbaycan Ordusunun apardığı hərbi əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, bu rayonların, eləcə də Xocavənd, Xocalı, Laçın rayonlarının və keçmiş Ağdərə rayonunun bir hissəsi azad olunub.
Noyabrın 10-da hərbi əməliyyatlar dayandırılıb. Ermənistan noyabrın 20-də Ağdam rayonunu, noyabrın 25-də Kəlbəcər rayonunu, dekabrın 1-də Laçın rayonunu Azərbaycana qaytarıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun böyük hissəsi ermənilərin nəzarətində qalır.
Ermənistan silahlı qüvvələri 44 günlük müharibədə Tərtər, Goranboy, Bərdə, Yevlax, Ağcabədi, Beyləqan, Füzuli, Ağdam rayonlarını, Naftalan, Gəncə, Mingəçevir şəhərlərini və başqa əraziləri (Daşkəsən, Gədəbəy, Göygöl, Kürdəmir, Qəbələ, Abşeron, Xızı, Siyəzən) atəşə tutub.
