Ən yeni iqtisadi göstəricilər
2020-ci ilin yanvar-noyabr aylarında Azərbaycanda 64,7 milyard manatlıq, əvvəlki ilin eyni dövrünə nəzərən 4,3 faiz az ümumi daxili məhsul (ÜDM) istehsal olunub. Novator.az-ın məlumatına görə, hesabatı yayan Dövlət Statistika Komitəsi bildirir ki, iqtisadiyyatın qeyri neft-qaz sektorunda əlavə dəyər 2,9 faiz, neft-qaz sektorunda 6,5 faiz azalıb.
Əhalinin hər nəfərinə düşən ÜDM 6485,7 manat göstərilir.
Başqa bir hesabata əsasən, yanvar-noyabr aylarında sənayedə 33,7 milyard manatlıq, 2019-cu ilin 11 ayı ilə müqayisədə 4,7 faiz az məhsul buraxılıb. Neft-qaz sektorunda məhsul istehsalının 6,4 faiz azaldığı, qeyri neft-qaz sektorunda 11,4 faiz artdığı vurğulanır.
Həmçinin qeyd olunur ki, yanvar-noyabr aylarında əsas kapitala 12 milyard 716,6 milyon manat məbləğində, 2019-cu ilin eyni dövrü ilə müqayisədə 4 faiz az vəsait yönəldilib, neft-qaz sektoruna yatırılmış investisiyaların həcmi 8,4 faiz artıb, qeyri neft-qaz sektoruna yönəldilən vəsaitin həcmi 11 faiz azalıb.
