Əmanətlərin sığortalanması: layihələr ilk oxunuşdan keçdi
“Əmanətlərin tam sığortalanması haqqında” qanunun tətbiq müddəti 2021-ci il aprelin 5-dək uzadılır. Layihə parlamentin 11 dekabr iclasında ilk oxunuşdan keçib.
2016-cı il martın 4-dən qüvvədə olan “Əmanətlərin tam sığortalanması haqqında” qanun hazırda illik faiz dərəcəsi milli valyutada 12 faizdən, xarici valyutada 2,5 faizdən yüksək olmayan əmanətləri tam sığortalayır.
Milli Məclis dekabrın 11-də “Əmanətlərin sığortalanması haqqında” qanuna dəyişiklikləri də ilk oxunuşda qəbul edib. Novator.az bildirir ki, layihəyə görə, fiziki şəxslərin qorunan əmanətləri üzrə kompensasiya məbləği 30 min manatdan 100 min manata (xarici valyutada 100 min manat ekvivalentinədək) artırılır.
Başqa bir yeniliyə əsasən, sahibkarlıq fəaliyyəti ilə məşğul olan fiziki şəxslərin bank hesablarında olan vəsaitlərin maksimum 20 min manatı, notariusların depozit hesablarında qalmış, fiziki şəxslərə məxsus pul vəsaitləri tam məbləğdə sığortalanır.
Qanunda dəyişikliklər rəsmiləşsə, 5 aprel 2021-ci ildən qüvvəyə minəcək.
