“YAŞAT” Fondu yaradıldı
Dekabrın 8-də fərman imzalayan prezident İlham Əliyev Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək fondu – “YAŞAT” Fondu yaradıb. Fond Azərbaycanın ərazi bütövlüyünün müdafiəsi ilə əlaqədar əlilliyi müəyyən olunmuş hərbi qulluqçulara və şəhid olmuş şəxslərin ailələrinin üzvlərinə; işğaldan azad edilmiş ərazilərdə xidməti vəzifələrini yerinə yetirərkən, habelə hərbi əməliyyatlar bitdikdən sonra onun nəticələrinin aradan qaldırılmasında iştirak etməsi nəticəsində dövlət orqanlarının (qurumlarının) əlilliyi müəyyən olunmuş əməkdaşlarına və ya həlak olmuş əməkdaşların ailə üzvlərinə əlavə dəstək verilməsi (maliyyə yardımlarının göstərilməsi və digər dəstək tədbirlərinin həyata keçirilməsi) üçün qurulur:
Vəsait Azərbaycan vətəndaşlarının, xarici ölkələrdə yaşayan soydaşların, digər fiziki və hüquqi şəxslərin könüllü olaraq maliyyə vəsaiti şəklində verdiyi yardımlar (ianələr), habelə qanunla qadağan olunmayan digər mənbələr hesabına formalaşdırılır.
Fondun vəsaitinin sərəncamçısı Vətəndaşlara Xidmət və Sosial İnnovasiyalar üzrə Dövlət Agentliyidir. Vəsaitin formalaşdırılmasına və idarə olunmasına ümumi nəzarəti prezidentin yaratdığı Himayəçilik Şurası həyata keçirir.
Prezident sərəncamı ilə Himayəçilik Şurasına bu şəxslər daxil olub:
Abdullayev Çingiz Akif oğlu
Alızadə Sevinc Əsgərxan qızı
Aslanov Novruzəli Davud oğlu
Aşina Məsud
İbrahimov Mənsum İsrafil oğlu
İsgəndərov Anar Camal oğlu
Qasımov Balakişi Ələkbər oğlu
Novruzov Cahangir Mütəllib oğlu
Ramaldanov Şair Ramaldan oğlu
Səfərəliyeva Rəna Teymur qızı
Zəkiyev İlham Əzizağa oğlu.
Qaydaya görə, fondun vəsaitindən bu istiqamətlərdə istifadə olunur:
– şəhid ailəsi statusu alana və ya əlilliyi müəyyən edilənədək götürülən istehlak kreditlərinin və digər borc öhdəliklərinin qarşılanması;
– müalicə və psixoloji dəstək xərclərinin ödənməsi;
– təhsil almasına, habelə əlavə təhsilinə, peşə hazırlığının artırılmasına, eləcə də yaradıcı potensialının inkişafına kömək edilməsi ilə bağlı xərclərin ödənməsi;
– məişət şəraitinin yaxşılaşdırılması;
– Himayəçilik Şurasının müəyyən etdiyi digər istiqamətlər.
